December 09, 2021

Не е „Сексот и градот“ без Саманта

Ве молам доколку се уште не сте ги погледнале првите 2 премиерни епизоди од новиот reboot на добро познатата серија „Сексот и градот“ да не читате понатаму бидејќи ќе следат спојлери.

Ви благодарам 😊

Саманта - жената која беше најгласен борец, не смееше и изјавуваше мудри мисли како што е: „Бракот не гарантира среќен крај, туку само еден крај“, ми недостасува премногу!

Таа ми беше и до ден денес ми е омилениот лик од серијалот, затоа што беше целосно, автентично, своја.

Заминувањето на актерката Ким Катрал од серијата беше како едно замрсено клопче.

Искрено, очекував воопшто да не го спомнат ликот на Саманта, но бев пријатно изненадена што сепак на некој начин, барем во серијата го објаснија нејзиното заминување.

Секако слушајќи ги изјавите кажани за Саманта ме натераа да се подзамислам дали нешто што ликовите на Кери, Миранда и Шарлот го кажуваат во првите 2 епизоди е дел од оној "Живот имитира уметност" момент.

Кери признава дека ја отпуштила Саманта како нејзин агент, откако пазарот на книги попуштил. Саманта лично го сфатила пропаѓањето на бизнисот, се одселила во Лондон и ги заледила комплетно односите со нејзините три пријателки.

Во еден момент Кери и вели на Миранда: „Мислев дека ме гледа како повеќе од АТМ банкомат“.

Сепак, кога сопругот на Кери, Џон Џејмс Престон (или како милуваат сите во серијата да го викаат Ѕверката) ќе почине, Саманта и испраќа на својата долгогодишна пријателка венец од цвеќиња кои ќе лежи поставен врз ковчегот на Џон за време на целата церемонија. Со венецот дојде и порака од Саманта до Кери со која на некој начин серијалот симболично ни кажува дека двете жени се уште се тука една за друга, посебно во моментите кога им е најтешко.

Без Саманта, серијата очајно се обидува да ја пополни огромната дупка со додавање на нови членови во актерската екипа.

Колку што можев јас да заклучам, причината за проширувањето на актерската екипа не е само поради заминувањето на Саманта, туку и поради фактот што оригиналната серија како што многу милуваа да кажат била "нереално бела", па така неколку жени во боја добија улога во продолжението.

Јас пак често сакам да ја користам оваа америчка фраза - „Немој да го поправаш она што не е скршено“.

Истата важи и во случајов. Не разбирам зошто креаторите на серии и филмови во последниве неколку години упорно ни наметнуваат или подобро кажано форсираат да голтаме разни нијанси на диверзитет и инклузивност?

Како да чувствуваат некоја постојана грижа на совест, па мораат да вклучат актерски екипи од секаков калибар во своите серии и филмови, без разлика дали ги бива или не, само за да пробаат да ја закрпат дупката од фактот што белата раса со децении наназад негувала ужасен третман кон останатите раси.

Секако, во ред е да има различности, на крајот на денот, тие и не прават посебни и уникатни, но сметам дека треба режисерите, односно креаторите на вакви серии и филмови да научат дека децениски погрешни постапки и третмани не можат да се надокнадат преку ноќ.

Се треба да се движи постепено, со време, да еволуира, да расте и да се менува.

Во завршниот дел, би сакала да се навратам на нешто што го начнав малку погоре, а тоа е смртта на Ѕверката.

Морам да признаам без никаков срам дека плачев. Плачев толку силно и одеднаш за најлошиот дечко на ТВ екраните.

Некако ми делува како серијата повеќе да се грижи и да обрнува внимание на губењето на естетиката на она што Кери и Ѕверката претставуваа како пар, отколку за губењето на еден од клучните ликови како што е Ѕверката, како човеково битие.

Кога Џон умира, Кери трча кон него под тушот, каде тој седи потпрен на ѕидот од туш кабината, држејќи ја едната рака на срцето, камерата зумира на сините Маноло Бланик стилето чевли на Кери кои пополека се дават и уништуваат во водата. Тоа беа оние истите стилето чевли кои Кери ги носеше за време на нивната венчавка во првиот филм.

Ова беше една од глупавите метафори кои го симболизираа крајот на еден токсичниот брак. Но, сепак, не останав имуна и заплакав силно за крајот на една љубовна ера.

Со ова во овој нов reboot се овозможува Кери да не чувствува потреба дека треба да ја игра улогата на некоја: „среќни до крајот на животот фантазија“ - како во "Сексот и градот 2", туку може да биде едноставно - Кери.

Проблематична, непромислена и плитка Кери...

December 06, 2021

Неколку животни лекции кои ги научив од "The Holiday"

Се сеќавам како да беше вчера... далечната 2007 година, беше едно жешко лето, а јас и мајка ми бевме седнати во ресторанот Џино на кафе. Наспроти нас на истата маса седеше за мене дотогаш сеуште непознатата професорка по англиски јазик во чие училиште завршив англиски јазик на крајот, но повеќе за тоа некој следен пат.

Ајде прво да почнам од почетокот. Имав начуено од мојата мајка дека во Скопје постои училиште за англиски јазик каде професорката секоја година (по желба на учениците кои се спремни и сакаат да одат) води група од ученици на летна школа во Англија, со престој од месец дена, поделени помеѓу Лондон и Бристол.

Јас како огромен вљубеник во англискиот јазик и пишаниот збор, вечно опседната со англиските класици пишани од Томас Харди, Џејн Остин и Бронте сестрите, од кога слушнав за оваа летна школа за учење јазик буквално пробав се за да изнајдам начин како да бидам и јас дел од ова, без притоа да имам посетувано часови во училиштето, што секако беше најголемата пречка тука.

Бев крајно млада, со само 12 години, буквално едно наивно и изгубено девојче кое тогаш, а можеби и ден денес се уште мечтае за оној англиски начин на живеење како на филмовите. Ова беше всушност главниот двигател да се одлучам на толку рана возраст да отпатувам некаде сама, за првпат по воздушен пат, без моите родители, во придружба на луѓе страни за мене.

И да скратам! Планот ми беше успешен секако. Отпатував за Лондон Хитроу во Јули 2007 година, и остатокот е историја.

Доаѓам конечно до суштината на овој пост каде ќе сфатите зошто беше потребно да ви го раскажам воведниот дел.

Пред да отпатувам за Англија, професорката ме замоли да погледнам неколку филмови како припрема за патувањето. Меѓу многуте предложени ми беше и тогаш ново излезениот филм по име "The Holiday" или нашки кажано "Одморот" каде ми посочи специфично да обрнам внимание на тогаш актуелниот англиски тренд swapping houses или house exchange (размена на домови) со непознати луѓе.

Филм кој од тој ден па наваму го обележува секој мој предбожиќен период.

Замислете во моментов како што пишувам во позадина оди на ТВ филмот! Која коинциденција така?

Гледајќи го ми дојде спонтана идеја за што да ви пишувам денеска.

Сакам со вас да споделам неколку лекции на кои овој безвременски филм ме подучи низ годините...

Научи кога треба да се збогуваш со минатото

Ајрис со години е вљубена во истиот маж. Невозвратена љубов, како што милува таа да каже. Човекот е нејзин шеф, а по објавувањето на свршувачката со една од нејзините колешки, Ајрис сè уште не може да се откаже од него. Јасно е дека тој продолжил понатаму, но таа едноставно не може. Џаспер ја навлекува со години, потсетувајќи ја на интимни спомени од времето кога биле заедно, давајќи и нејасни, но надежни сигнали. Конечно, Ајрис сфаќа дека таа секогаш ќе биде во заден план во неговите очи и ја презема контролата врз својот живот. Можеби тоа е најважната лекција, овој празничен период може да не потсети сите нас дека збогувањето со минатото е апсолутно во ред.

Понекогаш единствената личност која треба да научите да ја сакате сте вие

Иако двете главни девојки во филмот завршуваат на крај со партнери, сепак многу е важно да се напомене дека овој филм ни покажува и не учи дека и љубовта, или поконкретно сакањето на самите себе е исто толку важно.

Ако не можете да пуштите солза за поранешното момче, тој не бил вреден вашето време

Аманда Вудс не пуштила ни солза од кога нејзините родители се разделиле кога таа била само мало девојче. Кога дознава дека нејзиното момче ја изневерува, таа го исфрла надвор и се обидува да се соочи со нејзините фрустрации. Но, по неколку обиди да ја исплаче разделбата со момчето, солзите едноставно не и доаѓаат. Сигурен знак дека момчето не бил вреден за нејзиното време.

Треба да научиш да бидеш главната улога во твојата животна приказна

Додека Ајрис е на одмор во Америка, таа се спријателува со еден сладок старец по име Артур Абот, кој е поранешен холивудски писател. Кога со него ја споделуваше приказната за човекот кој и го скрши срцето дома, Артур и го понуди овој едноставен совет:

„Ајрис, во филмовите ја имаме дамата во главна улога и ја имаме нејзината најдобра пријателка. Ти, можам да кажам дека си дамата во главната улога, но поради некоја причина се однесуваш како да си најдобрата пријателка“.

🎄🎄🎄🎄🎄🎄🎄🎄🎄🎄🎄🎄🎄🎄🎄🎄🎄🎄🎄🎄🎄🎄🎄🎄🎄🎄🎄🎄🎄

„The Holiday“ е филмот кој ве прави да се чувствувате толку добро од кога ќе го изгледате, поради начинот на кој се претставени љубовта, пријателството и семејството, нешта кои ми создаваат навика секоја година да му се навратам.

За крај ве оставам со мојот омилен цитат (од ликот Артур Абот) кој нема ни да се трудам да го преведувам, бидејќи оригиналот сам по себе е уникатен и посебен и не му е достоен никаков превод:

Say a man and a woman both need something to sleep in and both go to the same men's pajama department. The man says to the salesman, "I just need bottoms", and the woman says, "I just need a top". They look at each other and that's the "meet cute".

December 05, 2021

Топ 4 Божиќни филмови на Нетфликс кои вреди да ги погледнете

Иако празничните класици како „It's a Wonderful Life“ и „A Christmas Story“ се задолжителни филмови без кои не може да помине овој празничен период од годината, не треба да застанете со божиќната забава тука.

Нетфликс како и секоја така и оваа година има сè што ви треба за да направите еден божиќен филмски маратон. Ви предлагам да си направите едно убаво топло какао, да ги исклучите сите светла, освен новогодишните сијалички и да се препуштите на празничната магија.

Па ајде да видиме кои 4 филмови ви ги издвоив кои треба да ги погледнете за време на оваа празнична сезона...

1. Single All the Way

Ова е божиќен филм за Питар, кој не сака да се соочи и очајно го избегнува неговото семејство кога станува збор за неговиот вечен сингл статус.

Тој се обидува да го убеди својот најдобар пријател и цимер Ник да дојде со него и да ги поминат заедно празниците со неговото семејство, преправајќи се дека тие двајца се пар. Но, кога мајката на Питер, Керол го мести својот син на состанок на слепо со нејзиниот згоден тренер Џејмс, планот на Питер оди наопаку.

„Single All The Way“ е романтична божиќна комедија во режија на Мајкл Мајер, која идната година ќе добие и свое продолжение.

Доколку сте љубопитни да дознаете што се ќе му се случува на Питар претплатете се на Нетфликс и дознајте!

2. A Castle for Christmas

Американската авторка на најпродаваниот серијал книги "Ема Гејл", Софи Браун, решава да го заврши серијалот со тоа што го убива главниот машки лик во последната книга од серијалот. Смртта на фиктивниот лик во книгата по име Винстон, ги вознемирува обожавателите на серијалот и Софи се соочува со бес од нејзините обожаватели по објавувањето на книгата. Менаџерот на Софи, Клер, ја убедува да напише уште една книга за да го надминат овој скандал.

По ужасното ТВ интервју во шоуто на Дру Беримор каде Софи проба да ја промовира новата книга, таа прави пауза и се решава отпатува од САД и да ја посети Шкотска затоа што нејзиниот покоен татко, Калум Мекгинти, ѝ раскажувал приказни за замокот Дан Данбар кога Софи била мала. За време на посетата на замокот Данбар таа се запознава со Војводата од Данбар и од таму почнуваат да и се случуваат секакви сплетки.

Ова е филм кој навистина заслужува да му се посвети посебно внимание!

3. Love Hard

Натали е девојка од Лос Анџелес која направила кариера пишувајќи за нејзиниот ужасен љубовен живот. По низа разочарувања, една нејзина пријателка ја убедува да го прошири радиусот на пребарување на нејзината dating апликација. Ова успева и таа почнува интензивно да се препишува и слуша со еден дечко. По особено долг разговор, дечкото инсинуира дека би сакал Натали да ја види во неговиот град за Божиќ. Натали се решава да го изненади и да отпатува за Божиќ да го види својот онлајн дечко Џош, но штом пристигне во неговиот дом сфаќа дека е измамена и дека тој не личи ни приближно на дечкото од онлајн профилот.

Што се ќе и се случува понатаму на Натали ве оставам да дознаете сами 😉

4. The Princess Switch 3: Romancing the Star

Заокружувајќи ја трилогијата, The Princess Switch 3 ја следи Ванеса Хаџенс понатаму во нејзините кралски авантури во Монтенаро. Овој пат, романтичната драма додава заплет поврзан со голем грабеж. Кога Ѕвездата на мирот исчезнува, кралицата Маргарет и Стејси бараат помош од „непристојната“ братучетка на кралицата, Фиона, чија улога секако ја толкува самата Хаџенс.

Фиона го повикува на помош својот долгогодишен пријател Питер Максвел кој е искусен крадец и заедно прават план како да ја украдат Ѕвездата на мирот назад.

Од сите The Princess Switch делови, овој е мојот омилен. Ванеса е толку смешна во улогата на Фиона, што навистина вреди да се погледне овој филм.