November 08, 2024

Драг Инстаграм...

Ајде да помуабетиме малку, може?

Јас и ти поминавме низ многу заедно: бескрајни скролања, филтри, бумеранзи и сите тие мали моменти што ги зачувуваш во твојот 24-часовен меур наречен „Стори“. Ама време е да си кажеме некои работи, затоа што искрено, ми треба промена.



Те сакам, Инстаграм, ама не ми треба секое стори да ми седи на профил како некој непосакан гостин што никогаш не поседувал чувство кога треба да си замине дома.

Работава е ваква. Животот тече брзо, и понекогаш само сакам и моите инстаграм сториња да се движат брзо!

Не мора секој момент што го објавувам да има драматични 24 часа слава. Некогаш, тоа е само краток бумеранг од кафе или рефрен од песна што моментално ми се вклопува во расположението „сега“ - не за два часа подоцна, а дефинитивно не утре наутро, кога моментот веќе го изгубил својот „шмек“.

Замисли ако ми дадеш избор: кратко, лесно, 3-часовно стори за тие „сега-за-сега“ моменти или солидни 12 часа за спомени што сакам да стојат денес (ама не баш засекогаш).

Дај ни и ние да имаме „flight options“ кога станува збор за сториња. Некои од нас се за кратки дестинации, а некои за долг лет. Опции, драг Инстаграм!



И да, знам дека сега сигурно размислуваш, „Па, секогаш можеш да го избришеш!“ Вистина е. 

Ама, бришењето на стори изгледа толку...финално. Како да велиш, „Ох, не, никогаш не сакав да го видите тоа!“ А тоа не е воопшто во мој стил.

Некогаш, сакам само да го „живеам моментот“ без да се обврзувам дека тоа ќе трае цел ден (или дека цел ден ќе размислувам „Кој ми го видел сторито?“).

Затоа, еве ја мојата понуда, Инстаграм: Дај ни го подарокот на избор. Дозволи ни да си избереме време за сторињата.

Брзи 3 часа за миговни моменти и променливи расположенија, 12 часа за оние сториња од кафана и дискотека на кои скоро сите од нас не сакаме воопшто ни да се навраќаме следниот ден и доколку е можно дури да се разбудиме и освестиме од мамурлакот да ги снема магично ко да не ни биле, или класични 24 часа стори за тие моменти што тешко ги пуштаме.

Што велиш? Ти си секогаш трендсетерот на социјалните мрежи, секогаш слушаш што сакаат луѓето. А верувај ми, ние ова го сакаме.

Да ги направиме сторињата свежи, флексибилни и со вистинската доза на минливост.

Твоја, ама не за цел ден,  

Лори 😉

Read more
on 0
labels

October 23, 2024

Љубовта во модерното време: Зошто е се потешко да се пронајде?

Не знам за вас, но ми се чини дека во денешно време да најдеш љубов е како да бараш игла во сено - само што сеното е огромна планина од „извини, не барам ништо сериозно“ и „ми се свиѓаш, но не сум спремен за врска.“

Сериозно, каде се скриле сите оние кои сакаат да сакаат?

Да се разбереме, љубовта не е изумрена, ама секако е во дефицит.



Денешниве „игри“ за запознавање се комплицирани: имаш Тиндер, Бамбл, 5375 пораки на Инстаграм од непознати ликови и се разбира, класиката - „Зошто не се јавуваш?“.

Што се случи со доброто, старо, запознавање на некој во реалниот свет?

Знаете, како во филмовите од 90-тите, кога случајно ќе се судрите на улица и ќе ви падне торба полна книги и – бум! Љубов!

Но, модерното време бара модерни решенија. Денес, за да најдеш љубов, треба да имаш CV за твојот љубовен живот. Сликите треба да се „исфилтрирани“, описот на профилот доволно интересен, а веднаш по запознавање следува серија на тестови – го знае ли хороскопот? Ќе се смее ли на моите лоши шеги? Знае ли дека Марвел и DC не се само за деца?



И сето тоа е прекрасно, но да бидеме реални, сите бараме нешто повеќе од „супер текстови“ и „лајкови.“ Бараме некој што ќе го разбере тој хаос во нашите глави и ќе го сака, без да се плаши од тоа.

Но, чекај, тука е и стравот - дали сум доволно добар/а? Дали заслужувам некој што ќе ме сака онаков/а каков/а што сум?

Кој е мојот одговор? Апсолутно, да!

Заслужуваме љубов, ама не било каква. Љубов што не се плаши од недостатоци, од хаос, од сите чудни навики кои ги носиме со нас. Љубов што те прави да се смееш дури и кога светот се руши околу тебе.

Зошто? Затоа што животот е краток, и да се биде сакан безусловно е најдобриот подарок што можеме да го добиеме.

Па, зошто е тешко да се најде љубов денес? Можеби затоа што се обидуваме да најдеме нешто совршено во свет кој не е совршен. Можеби затоа што љубовта не доаѓа на повик, туку доаѓа кога ќе престанеме да ја бараме под секој камен.

На крајот на краиштата, љубовта во модерното време не е невозможна - само е малку покомплицирана. Но, кога ќе дојде, ќе биде она што сме го чекале цело време.

А до тогаш, уживајте во патувањето, насмејте се на сите чудни моменти и не заборавајте - љубовта доаѓа кога најмалку очекувате. 😊


Искрено ваша,

Лори 💫
Read more
on 0
labels

October 21, 2024

Јелена Карлеуша: Дива од друга планета

На 19-ти октомври, арената „Јане Сандански“ во Скопје беше сведок на нешто посебно. Јелена Карлеуша донесе спектакл кој ќе се памети долго. Концертот беше дел од нејзината Alpha & Omega турнеја, и од самиот почеток на вечерта, беше јасно дека публиката ќе биде сведок на нешто незаборавно.

Но, она што сите ние од публиката не го знаевме беше низ што таа минувала додека настапуваше.



Во текот на концертот Alpha & Omega, атмосферата беше неверојатна, а сетлистата го вклучи најдоброто од нејзината кариера, комбинирајќи и нови и стари хитови.

Вистинска кралица, дури и кога нештата тргнуваат наопаку

Јелена го отвори концертот со својата позната песна „Karlyb*tch“, и од тој момент атмосферата беше наелектризирана. Но, додека ние уживавме во спектаклот, зад сцената се случуваа неочекувани проблеми. Еден од нејзините костими експлодирал на неа, а шлемот што го носеше и оставил сериозни повреди на челото. Нешто што мене лично ме воодушеви беше фактот дека таа продолжи да настапува без да дозволи никој да го забележи сето ова. Покрај сите овие предизвици, Јелена беше несопирлива и целосно посветена на публиката.



Низ годините многумина шпекулираа за нејзините гласовни способности и колку Јелена пее плејбек или во живо. Ќе ви кажам едно, таа жена пее, растура. Според мене, таа е еден целосен пакет, а таа вечер на 19-ти октомври на својата македонска публика и се подари целосно.

Јелена се вложи максимално во својот перформанс и барем јас не успеав во ниту еден момент да почувствувам дека нешто не е во ред во однос на сите работи кои се случувале за време на настапот на сцената. Е до толку е Карлеуша прав професионалец и си ја одработи својата задача маестрално.



Моменти кои ќе се паметат

Моментот кога Карлеуша ја изведе „Бисер Балкански“, со македонското знаме околу неа, беше еден од најемотивните моменти на вечерта. Публиката ја пееше песната заедно со неа, и во тој миг сите почувствувавме една голема гордост и силна емоција додека траеше изведбата.



Во текот на вчерашниот ден се разгори темата за тоа како Карлеуша смеела да го вее и носи на неа знамето додека била така облечена, тоа било срамота, таа била скоро па гола. Воедно исто така тема на муабет беше и тоа како ние не си го почитуваме нашето и не одиме на концерт кај нашата поп дива Калиопи, а одлучуваме да присуствуваме и испочитуваме српска пеачка.

Секако, како и секогаш не додржав, а да не го искажам своето мислење на мојот инстаграм профил со моја објава на stories каде накратко се осврнав на двете теми на муабет и воедно прокоментирав и уште една работа, а тоа е фактот што во иста вечер на 3 различни локации во градов имаше концерти на 3-ца мега популарни пеачи што резултираше со „расцепкување“ на публиката и пропуштање на изведбата на еден артист за сметка на другиот или третиот.

Тука оставам еден screenshot од моето story за да не должам многу и да објаснувам што сум пишала:



А сега од кога се осврнав на „драмата“ од вчера, време е да се навратиме на суштината на оваа објава, а секако тоа е Јелена и нејзиниот концерт.

За мене емотивниот врв на концертот се достигна кога Карлеуша ја изведе „Tihi Ubica“, посветена на нејзиниот поранешен сопруг Душко Тошиќ, со виртуелни водопади што течеа на екранот зад неа и кои дадоа дополнителен ефект на драма на сцената. Ова беше еден посебен момент кој ќе остане долго врежан во моето сеќавање.



Дива од друга планета

Иако ја носеше тежината на неколку повреди и проблеми со костимите, Јелена не го пропушти моментот да го подигне нивото на сценскиот настап на уште едно скалило повеќе. Нејзините зборови кои ги изјави на едно интервју по одржување на концертот во Скопје ми оставија голем впечаток: „Публиката не заслужува само да гледа некој што стои и пее. Тие заслужуваат спектакл, костими, кореографија, светски стандарди.“



И таа не само што ги исполни овие стандарди, туку ја помести границата уште повисоко.

По три часа полни со енергија, драма и емоции, си заминав од арената исполнета и восхитена. Јелена Карлеуша не само што е дива на Балканот - таа е светска ѕвезда која не натера сите да се чувствуваме како да сме биле дел од нешто големо и незаборавно.



Дали ние како публика достојно ја пречекавме и испративме не би можела конкретно да кажам. Сметам дека можевме да и пружиме многу многу повеќе љубов, почит и внимание кое вистински го заслужува.

Се надевам дека оваа ситна драма која се крена по нејзиниот концерт нема да и остави горк вкус и ќе посака повторно да ни се врати во Скопје и да ни пружи уште многу вакви спектакли.


Искрено ваша,

Лори 💫

Read more
on 0
labels
,
Subscribe to: Comments (Atom)