December 06, 2024

Блогмас ден 6: Како да ја избегнете замката на споредбата (и зошто ќе се чувствувате подобро без неа)

Да бидеме искрени, секој од нас се нашол во оваа ситуација.

Константно скроламе по социјалните мрежи, гледаме совршени слики и успешни приказни, преплавени од хипермотивација, а некаде длабоко во нас се јавува оној глас: „Зошто мојот живот не изгледа исто вака како на инстаграм?“.

Ќе признаам, не сум имуна ни јас на ова. Се фаќам себеси како се споредувам со другите, но сега барем знам како да се иземам и брзо да ја отстранам таа помисла од мојот ум, за разлика од порано.

Научив една важна лекција: На споредбите им нема крај.

Ќе има секогаш некој што изгледа подобро, заработува повеќе или патува на поинтересни места од мене. И ако постојано се фокусирам на тоа, единственото нешто што ќе го добијам е незадоволство.

Но, да бидам искрена, не беше лесно да го променам овој начин на размислување. Не доаѓа преку ноќ. Немаше некој "магичен" момент кога одеднаш престанав да се споредувам. Повеќе беше како процес, со мали промени, чекор по чекор. Еден ден си реков: „Добро, а зошто не се присетам на личноста која бев пред една година?“

И тогаш нешто во мене се смени.

Не тврдам дека повеќе никогаш не се споредувам. Тоа би било лага. Но, сега барем знам како да се вратам назад кон реалноста. Си поставувам прашање секоја вечер: „Што направив денес што ме прави горда?“.

Понекогаш одговорот е голем, како на пр. успешно завршен проект или донесена важна одлука. Но понекогаш е нешто мало, на пр. како да бидам љубезна кон некого или како да се справам со самата себе кога имам тежок ден. И знаете што? Сите тие работи значат нешто.

Една од најголемите промени што ја направив е како гледам на успесите на другите. Од секогаш сум се радувала на туѓите успеси, особено кога се работи за луѓето кои ги сакам. Секогаш се трудам да бидам поддршка и ветер во грб за пријателите и блиските. Не гледам на нивните успеси како на "проблем" за мене, туку како потсетник и мотивација дека и јас го можам истото. Но, она што го научив е дека дури и ако некој друг постигне нешто што јас посакувам, тоа не го намалува мојот успех и напредок. Сите ние одиме по различни патеки, во различни тајминзи.

Наместо да се споредувам, сега се трудам да се инспирирам од тие луѓе. Ако некој од моите пријатели постигне нешто големо, навистина се радувам за нив. Да, понекогаш тоа не е лесно, особено ако сте во тежок период. Но, инспирацијата од туѓите успеси е далеку помоќна од љубомората.

Ова не значи дека секогаш сум во зен-мод и дека постојано сум позитивна. И јас имам лоши денови. Но, научив дека вистинското прашање што треба да си го поставувам често е: „Што правам за себе?“

Мојот најголем совет е ова: споредувајте се само со себе си. Погледнете каде сте биле пред една година, шест месеци или дури и минатата недела. Сигурна сум дека ќе видите колку многу сте пораснале.

Ако никој не ви го кажал ова денес, еве јас ќе ви го пишам тука: Јас сум горда на вас.

Горда сум на сите ваши "тивки успеси" што никој не ги гледа. На сите мали моменти кога сте сакале да се откажете, но не сте се откажале. Секој мал напредок значи нешто, и не треба да го заборавате тоа.

Не дозволувајте споредбата да биде крадец на вашата среќа. Фокусирајте се на вашиот пат. Немојте да се обидувате да бидете подобри од некој друг. Бидете подобри од личноста која бевте вчера.

Искрено ваша,

Лори 🎄

December 05, 2024

БлогМас ден 5: „U&Z Influencer Awards 2024“ - ноќ за паметење

Кога одлучив да се пријавам за „U&Z Influencer Awards 2024“ во категоријата „Lifestyle Influencer – New Star“, не знаев што точно да очекувам. Но, едно знаев со сигурност - сакав да ја прославам мојата страст и труд што ги вложив неуморно, посебно во оваа без малку помината година. Затоа денес, во рамки на мојата БлогМас ден 5 објава, сакам да ја споделам оваа приказна со вас.

Кога Убавина и Здравје го отворија јавниот повик за номинации, не размислував долго, знаев дека ова е можноста што ја чекав. Самото пријавување беше личен предизвик, бидејќи го вложив најдоброто од себе во секој збор на мојот блог и секоја фотографија што ја објавив на социјалните мрежи и сметав за себе си дека сум конечно спремна за, како што би го рекле Англичаните: "to put myself out there".

Кога добив порака од Убавина и Здравје профилот на инстаграм дека сум влегла во потесниот круг и сум дел од номинираните и дека треба да направам креативно видео и да го споделам на мојот профил за да преминам во финалната фаза на номинирани, беше потврда дека она што го правам има вредност и дека луѓето го препознаваат мојот труд.

Да бидам дел од една ваква приказна, во категорија спонзорирана од реномираниот skincare бренд CeraVe, беше навистина посебен момент за мене.

На 3 декември, зачекорив на гламурозниот Ragusa Rooftop 360 подготвена за магија. Настанот беше совршено организиран од страна на Убавина и Здравје, од декорациите до атмосферата, се блескаше. Но, за мене, најважно беше чувството на гордост што сум таму, меѓу толку многу талентирани и успешни личности.

Поминав вечер исполнета со насмевки, разговори, сликање, играње и пријатни моменти. Од коктелите на Швепс до настапот на Brass Brothers кои ги размрдаа сите присутни, буквално секој детал беше дел од еден гламурозен мозаик што ќе го паметам засекогаш.

Иако не ја освоив наградата, оваа номинација за мене беше повеќе од победа. Ми докажа дека нештата се остваруваат кога ќе се осмелиш да веруваш во себе. Овој настан беше потсетник дека секој чекор – колку и да изгледа мал – е важен дел од патот до успехот кој лично јас го посакувам.

Вечерта ме инспирираше да продолжам да создавам, да растам, постојано да се надградувам и да станувам секој ден се подобра и подобра.

Голема благодарност до сите што ме поддржувате и сте заедно со мене на ова мое чудно, но интересно патување. Ова искуство не би било исто без вас. Ви благодарам што сте дел од мојата приказна, што верувате во мене и што ми дозволувате да бидам дел од вашите животи преку содржините што ги создавам.

Исто така, уште еднаш сакам да напишам едно огромно БЛАГОДАРАМ до Убавина и Здравје за организацијата и до CeraVe за поддршката во мојата категорија.

Ова беше само еден чекор во едно поголемо патување, и јас сум подготвена за се она што допрва ќе следува.

До следниот ден од БлогМас!

Искрено ваша,

Лори 🎄

December 04, 2024

БлогМас ден 4: Моето австриско слатко искуство – Захер, Моцарт и Сиси торта

Ако има нешто на што никогаш не можам да одолеам, тоа е да пробам локални десерти додека патувам. За време на моето неодамнешно патување во Салцбург и Халштат, уживав во три далеку познати австриски торти: Захер, Моцарт и Сиси торта.

Иако секоја имаше свој уникатен шарм и вкус, не сите ги оправдаа очекувањата и високата цена.

Еве го мојот искрен впечаток за овие слатки задоволства, заедно со неколку препораки ако планирате свое австриско десертно патување.

Захер торта – нејзиното преценето Височество

Да започнеме со најпознатата од сите: Захер тортата. Ја пробав оваа чоколадна торта во легендарниот Хотел Захер во Салцбург, и додека бев возбудена што конечно ја вкусив оваа австриска класика, морам да признаам дека не ги исполни моите очекувања.

Вкус: Верна на своето име, Захер тортата беше премногу блага и изненадувачки сиромашна со состојки. Самата торта беше малку сува, а тенкиот слој од мармалад од кајсија не успеа значително да го подобри вкусот.

Цена: Како што може да се очекува, цената беше висока – многу повисока од она што го добив за таа вредност. Цената на парче Захер торта во Хотел Захер Салцбург изнесува 11 евра.

Вреди ли?: Ако сте огромен обожавател на благи десерти и сакате да го "штиклирате" ова искуство од вашата bucket листа, како што тоа го направив јас, тогаш слободно пробајте ја. Но, за мене, тоа повеќе беше туристичко искуство отколку кулинарско уживање.

Моцарт торта – Кремаста, но не на добар начин...

Следна на мојата листа беше Моцарт тортата, која ја вкусив во шармантното и далеку познато Кафе Моцарт во Салцбург. Оваа торта, инспирирана од музичкиот гениј на градот, беше подобра од Захер тортата, но сепак не достигна совршенство.

Вкус: Моцарт тортата имаше пријатна комбинација на вкусови, со слоеви од чоколадо, ф’стаци и марципан. Сепак, имаше премногу крем, кој ги надвладеа другите состојки. Кон крајот, се чувствував тешко наместо задоволно.

Цена: Слично на Захер тортата, и оваа беше скапа. Иако беше подобра во вкусот, цената се уште не беше оправдана. Цената на парче Моцарт торта во Кафе Моцарт изнесува 6 евра.

Вреди ли?: Ако сте љубител на кремасти десерти, вреди да ја пробате еднаш. Таа е чекор погоре од Захер тортата, но не е нешто кон кое повторно би се навратила некогаш да го вкусам.

Сиси торта – Лесна текстура и најдобар вкус

На крајот, ја завршив мојата десертна авантура со Сиси тортата која ја вкусив во Халштат, во едно пријатно локално кафе. Именувана по саканата сопруга на императорот Франц Јозеф I - Елизабета (Сиси), оваа торта беше јасен победник во мојата книга.

Вкус: Лесна, мека и совршено избалансирана, Сиси тортата беше сон за јадење. Не беше премногу блага, а вкусовите хармонично се спојуваа без ниту еден елемент да доминира над другите. Ова беше десерт што можев да го уживам без да се чувствувам тешко потоа.

Цена: Иако беше исто така на поскапата страна, оваа торта речиси ја оправда цената според квалитетот и вкусот. Цената на парче Сиси торта во локалното кафе изнесуваше 6 евра.

Вреди ли?: Апсолутно. Ако се најдете во Халштат, топло ви препорачувам да ја побарате Сиси тортата – тоа е десерт кој навистина ја доловува елеганцијата и рафинираноста на нејзината имињачка.

Од трите торти што ги пробав, Сиси тортата беше далеку најдобра. Моцарт тортата беше солидна втора, додека Захер тортата не ја оправда својата легендарна репутација.

Сепак, сите три беа прилично скапи, и не би рекла дека некоја од нив беше целосно вредна за цената ако сте на буџет.

За некој како мене, кој ужива во благо и обожава традиционални десерти, пробувањето на сите три торти беше неопходен дел од моето австриско искуство.

Ако планирате да ги посетите Салцбург или Халштат, препорачувам да пробате барем една од овие торти – заради културното и гастрономското искуство.

На крајот на краиштата, има нешто магично во седењето во удобно кафе, пиење топол напиток и уживање во парче австриска историја.

До следниот БлогМас!