December 10, 2024

БлогМас ден 10: Магијата на зборовите – Како @wordsbynoko освојува срца со пишаниот збор

Во Инстаграм светот, каде совршенството често е маска, еден профил успева да биде комплетно различен и автентичен, а тоа е профилот - @wordsbynoko.

Зад овој профил стои Новица Коцев, копирајтер и маркетинг специјалист од Македонија. Но, ако ги прашате неговите следбеници, ќе ви кажат дека тој е нешто многу повеќе од само тоа.

Неговите објави не се класични „мотивациски“ цитати што ќе ги заборавите веднаш штом ги прочитате. Не, неговите зборови се како шепот кој ви го шепнува она што веќе го чувствувате, но не сте знаеле како да го искажете. Тие зборови ви звучат познато — како да се ваши мисли, само подобро формулирани.

„Како да ми ги прочитал мислите“ — ова е една од најчестите реакции што ќе ја видите во коментарите под неговите објави. Без разлика дали зборува за љубовта, самодовербата или животните премрежја, секој збор ја погодува својата цел. Тоа е моќта на вистината — таа секогаш го наоѓа патот до срцето.

Додека другите профили на Инстаграм објавуваат „совети за успех“ или „10 чекори до среќа“, @wordsbynoko навлегува подлабоко. Наместо рецепти за успех во живот, тој нуди реалност. Некогаш, тоа е само еден збор или кратка реченица, но ефектот е посилен од цел роман.

Секој што барем еднаш се почувствувал изгубено, разочарано или на раб на промена, ќе пронајде дел од себеси во неговите зборови. Тоа не се „инспиративни цитати“ — тоа се човечки чувства претворени во зборови. И токму затоа, луѓето не само што ги читаат, ги чувствуваат и одново и одново им се навраќаат.

Во време кога сите тежнеат кон тоа да бидат видени, Новица Коцев не потсетува колку е важно да се чувствуваме разбрани. Тој не се обидува да биде инфлуенсер — неговата цел не е слава, туку искреност. И токму таа искреност е причината зошто луѓето се враќаат на неговиот профил.

Секој од нас има моменти кога се чувствува како да не е разбиран од околината. И тогаш, од никаде, ќе се појави објава од @wordsbynoko што ќе ви каже точно она што ви треба да го чуете во тој момент. Не е магија — тоа е реалност.

Во свет преполн со гласови што се борат за нашето внимание, @wordsbynoko не вреска — тој слуша. И затоа неговите зборови остануваат. Тие се потсетник дека не сме сами, дури и во најтивките моменти од нашиот живот.

Ако некогаш ви треба глас што ќе ве потсети дека се е во ред, дека не мора секогаш да бидете „најдобри“ или „совршени“, посетете го Инстаграм профилот @wordsbynoko. Можеби нема да најдете решенија за сите ваши проблеми, но сигурно ќе најдете збор што ќе ве погоди право во срцето.

Затоа што добриот збор не е само за читање. Тој е за чувствување.

Искрено ваша, 

Лори 🎄✨️

Read more

December 09, 2024

БлогМас ден 9: Инстаграм vs. Реалност — работите што не ги објавуваме

Кога ќе скролате на Инстаграм, се изгледа совршено, нели? Беспрекорна кожа, патувања од соништата, совршено украсени празнични домови и парови кои изгледаат како да излегле од некоја си романтична комедија.

Лесно е да се “фатиш” на јадицата. И мене ми се случило. Но, денес, сакам да ги отстранам филтрите (буквално и метафорички) и да зборувам за нешто вистинско — разликата помеѓу Инстаграм и реалноста.

Секој од нас има направено по 15 селфи фотографии само за да ја објави онаа една која изгледа како да се разбудил роден со филтер. Но, што не гледате? 14-те избришани фотографии поради лош агол, чудно осветлување или „кај ми беше умот“ додека ја сликав сликава.

За време на моето неодамнешно патување во Салцбург, Австрија, објавив прекрасна фотографија од еден божиќен пазар. Изгледаше магично, светилките блескаа, варениот пунч во рака, а во позадина се доловува веселата атмосфера. Но, што не видовте? Моите замрзнати прсти, 30-минутното чекање за да го добијам варениот пунч и благиот стрес кој се јави додека пробував да ја „фатам вистинската фотографија“ пред толпата да ме турне настрана. Која беше реалноста? Прстите ми беа вкочанети, трпението истрошено, а толпата — се само не мирна.

Но фотографијата? Апсолутно прекрасна.

Вистината е дека животот не е совршен инстаграм фид. Тој е неуреден, непредвидлив и понекогаш прилично здодевен. Но Инстаграм не залажува да мислиме дека животот на сите други е како некоја филмска монтажа. Како што напоменав и погоре, и јас сум паднала на оваа фора. Имало моменти кога сум се чувствувала како да заостанувам затоа што мојот живот не изгледа како туѓиот. Ќе видам некој што објавува „работа-од-дома“ фотографија со запалени свеќи, лаптоп уредно поставен на бела прекривка и кафе, штотуку сварено што испушта пареа. А јас? Работам од кујнската маса, во чорапи што не се совпаѓаат, со трошки од појадокот уште на чинијата.

Толку е лесно да се заборави дека Инстаграм ги покажува само најдобрите моменти, а не целата приказна. Никој не објавува за стресните рокови, ноќите поминати во анксиозност и неспиење или деновите кога едноставно не ми се прави ништо.

Еве ја реалноста: Животот не е секогаш естетски. Понекогаш, сум среќна ако само го поминам денот без да се чувствувам преоптоварено. Не мора се да биде „момент“ што ќе се објави на социјалните мрежи. Порано мислев дека ако не објавам нешто, тоа е како да не се случило. Но, искрено, некои од најдобрите моменти во мојот живот немаат никакви фотографии за да докажат дека се случиле.

Се сеќавате на онаа позната изрека, „Don’t compare your behind-the-scenes to someone else’s highlight reel“? Клише, но вистинито. Социјалните мрежи ви го покажуваат финалниот производ, но животот е полн со блупери. И тоа е во ред. ОК е да имате денови кога вашиот „контент“ е само вие, ќебе и шолја кафе. Без фенси описи. Без естетски позадини. Само вистински, нефилтриран живот.

Зошто ова го споделувам?

Овој БлогМас серијал ми овозможува да се искажам и прикажам таква каква што сум — не само полирана, “средена” верзија, туку човечка, автентична верзија од себе. И знам дека не сум сама во ова. Сите ние скроламе низ тие совршени фидови и го чувствуваме оној мал убод од помислата: "зошто мојот живот не изгледа вака?". Но, ве уверувам, зад секоја беспрекорна фотографија има човек со несигурности, сомнежи и необјавени моменти што изгледаат далеку од совршени.

Затоа, ако се чувствувате како да заостанувате, ако вашиот дом не изгледа како филмска сцена за време на празниците или ако вашите празнични фотографии не излегоа „вредни за објава“ — не сте сами. Животот не е Инстаграм филтер и никогаш нема да биде.

Нека ова биде потсетник дека реалноста, со сите нејзини маани и несовршености - е доволна.

Ајде да ја прифатиме таква каква што е.

Се гледаме утре за БлогМас ден 10!

Искрено ваша,

Лори 🎄✨️

Read more

December 08, 2024

БлогМас ден 8: 5 места што мора да ги посетите во Салцбург

Салцбург е еден од оние градови што изгледа како божиќна бајка, дури и без снег. Имав можност лично да го доживеам, и иако немаше снег, шармот и празничната магија беа неспорни.

Светилките, мирисот на варено вино и пунч, звуците на божиќните песни беа повеќе од доволни за да ме внесат во празничниот дух.

Ако планирате божиќно патување во Салцбург, ова се 5-те места што мора да ги посетите:

1. Божиќниот пазар во Салцбург (Christkindlmarkt)

Ако има едно место што го дефинира Божиќ во Салцбург, тоа е Божиќниот пазар во Салцбург. Лоциран на Residenzplatz и Domplatz, ова е еден од најубавите и најстарите божиќни пазари во Европа. Имав видено фотографии онлајн, но ништо не ме подготви за тоа колку беше прекрасно се во живо.

Пазарот е преполн со дрвени тезги што продаваат се – од рачно изработени украси до топли шалови и празнични сувенири. Воздухот беше исполнет со мирисот на печени костени и Glühwein (варено вино), што направи невозможно да не застанам за топол пијалак.

Мој совет: Отидете навечер кога светилките сјаат, а гужвите се помали. Земете варено вино или пунч и уживајте во празничната енергија.

2. Тврдината Хоензалцбург (Hohensalzburg Fortress)

Тврдината Хоензалцбург е едно од оние места каде што застанувате и си велите: „Вау.“ Сместена на врвот на ридот, таа нуди еден од најспектакуларните погледи на Салцбург. Иако немаше снег, погледот на познатите црвени покриви и реката што тече низ градот беше незаборавен.

Се качив со жичницата до тврдината, и штом стигнав горе, знаев дека вреди. Можев да го видам целиот град под мене, а во далечината се гледаа планините. 

Мој совет: Посетете ја за зајдисонце. Иако јас го немав тој временски луксуз, сепак мислам дека гледањето на зајдисонцето над градот, додека топлата златна светлина ги осветлува покривите, би било магично доживување додека сте на таа локација. Ќе посакате да направите безброј фотографии.

3. Дворецот и градините Мирабел (Mirabell Palace and Gardens)

Сакам моменти на тишина кога патувам, а градините Мирабел ми го понудија токму тоа. Иако немаше снег, градините сепак имаа мирна, бајковита магија. Живите огради беа совршено уредени, скулптурите гордо стоеја, а чистиот воздух оставаше чувство на свежина.

Прошетав низ патеките, го разгледав архитектонскиот стил на дворецот и познатите фонтани. Исто така, открив мал божиќен пазар во близина на плоштадот Мирабел – помал, но поинтимен простор за прошетка и топол пијалак.

Мој совет: Ако барате мирно место за фотографирање, ова е совршеното место. Симетричните градини се идеална позадина за убави фотографии и сето ова е бесплатно. Не треба да плаќате никаква влезница за да направите незаборавни фотографии на оваа позната локација каде се снимени неколку сцени од добро познатиот филм - " The Sound of Music ".

4. Опатијата Св. Петар и гробиштата

Морам да признаам – не очекував да бидам толку трогната од опатијата Св. Петар и гробиштата, но тоа беше едно од најнезаборавните места на моето патување. Ова место има безвременска енергија, со камени патеки, ѕидови обвиткани со бршлен и прекрасно сочувани и одржани гробови.

Овде е погребана и сестрата на Моцарт, Нанерл. Чувството дека шетате низ место со толку многу историја е уникатно.

Мој совет: Посетете го попладне кога е потивко. Тоа е одлично место за бегство од гужвите, но и ќе ви понуди мир. Не знам за вас, но јас додека чекорев низ гробиштата почувствував некаков чуден мир.

5. Божиќниот пазар Хелбрун (Hellbrunn Christmas Market)

Ако сакате божиќен пазар со малку повеќе Божиќен дух и атмосфера од вообичаено, тогаш пазарот во Хелбрун е местото што мора да го посетите. Првото нешто што ќе го забележите е огромниот адвентски календар на фасадата на дворецот. Секој прозорец претставува ден од декември, и целиот дворец свети навечер.

Пазарот е опкружен со дрва и има некаква уникатна атмосфера. Ми се чинеше поинтимно и помалку комерцијално од поголемите пазари во центарот на градот.

Мој совет: Дојдете доцна попладне за да го видите како светилките се палат. Земете си еден топол пунч од портокал во рака да ве топли и уживајте.

Знам дека повеќето луѓе го замислуваат Салцбург со снег за Божиќ, но верувајте ми – нема потреба од снег за магијата да биде реална. Светилките, звуците на божиќни песни и мирисот на варено вино го прават Салцбург да изгледа како бајка.

Секое од овие пет места ми понуди нешто посебно – од тивките градини на Мирабел до живописниот пазар во Хелбрун. Салцбург има начин да ве натера да се чувствувате како да сте во божиќна приказна.

Кое од овие места би сакале да го посетите прво? Споделете во коментарите и не заборавајте да останете со мене за БлогМас ден 9!

Искрено ваша, 

Лори 🎄✨

Read more