March 03, 2025

Оскари 2025: Најдобро облечените ѕвезди на црвениот тепих

Ако има една вечер во годината кога модата зборува погласно од зборовите, тоа дефинитивно е ноќта на Оскарите. Вчерашниот црвен тепих беше спектакл од раскош, елеганција и модни ризици - некои успешни, некои помалку. Но, за мене, овие аутфити беа вистинскиот врв на гламурот, комбинација на софистицираност, стилска храброст и беспрекорно модно чувство.

Ова се ѕвездите кои ме оставија без здив и кои според мене ја заслужуваат титулата најдобро облечени на овогодинешните Оскари.

Аријана Гранде во Schiaparelli Haute Couture

Аријана Гранде изгледаше како да излегла од бајка во оваа пастелно розова креација од Schiaparelli, извезена со 190.000 кристали. Овој фустан не само што ја долови нејзината ефирна естетика, туку и ја направи да изгледа како вистинска принцеза на вечерта. Што најмногу ми го привлече вниманието? Кристалите! Кристалите кои ја фаќаа светлината со секој нејзин чекор.

Деми Мур во Giorgio Armani Privé

Деми Мур докажа дека вистинскиот стил нема рок на траење. Овој Giorgio Armani Privé фустан со длабоко деколте и плисирани детали беше дефиниција за раскошна едноставност. Понекогаш, не е потребно ништо повеќе од совршен крој и беспрекорна самодоверба, а Деми ги поседуваше и двете на црвениот тепих на вчерашните Оскари.

Зои Салдана во Saint Laurent

Зои Салдана се појави во богата, вино-црвена тоалета со проѕирни ракавици и Cartier накит. Овој аутфит мораше да влезе во моите фаворити затоа што Зои изгледаше како некоја глумица излезена од стар Холивуд, но со модерен осврт. Чиста 5-ка!

Селена Гомез во Ralph Lauren Collection

Селена изгледаше како живо ремек-дело во блескава тоалета извезена со 16.000 стаклени капки. Ова е тип на фустан што говори сам за себе, а Селена беше совршена муза за него.

Ема Стоун во Louis Vuitton

Секогаш ме воодушевува како Ема Стоун знае да изгледа кралски без да изгледа пренападно. Оваа шампањ тоалета беше дефиниција за тиха елеганција. Нема премногу украси, нема екстремни кроеви, само чиста софистицираност.

Мишел Јео во Balenciaga

Оваа кралско-сина тоалета од Balenciaga беше апсолутен моден момент. Асиметричниот крој и драматичниот шлеп создадоа впечатлив изглед, кој го зацврсти местото на Мишел Јео како една од најдобро облечените жени на црвениот тепих.

Џереми Стронг во Prada

Џереми Стронг е моден risk-taker, и тоа го обожавам! Овој маслинесто-зелен костум со екстра голема машна беше потег што или ќе го мразиш или ќе го обожаваш. Јас? Го обожавам!

Хали Бери во Christian Siriano

Хали Бери ја изнесе најмодерната интерпретација на оскаровски гламур. Овој mirror-like фустан буквално рефлектираше светлина и создаваше уметнички момент на секоја фотографија. Дефинитивно нешто неконвенционално, но генијално!

Џеф Голдблум во Gucci

Џеф Голдблум секогаш знае како да го направи класичното забавно! Овој Gucci костум со кремасто сако, цветна принт кошула и виолетова марама е доказ дека можеш да излегаш беспрекорно, а сепак да се забавуваш и да не земаш се пресериозно, па дури ни кога се работи за аутфит со кој треба да се појавиш на Оскарите. Џеф Голдблум добива чиста 5-ка за ова издание!

Гал Гадот во Givenchy

Кога сакаш да оставиш печат без да кажеш ниту збор, избери тоалета во црвена боја. Гал Гадот го направи токму тоа. Овој Givenchy фустан изгледаше моќно, женствено и безвременски.

Фелисити Џонс во Versace

Сребрениот металик аутфит на Фелисити Џонс беше едноставен, но неверојатно впечатлив. Оваа тоалета е доказ дека иднината на гламурот е сега.

Голди Хоун и Курт Расел (дизајнер непознат)

Голди и Курт изгледаа како парадигма на стар холивудски гламур. Златната, драпирана тоалета на Голди, украсена со металик кристали и корсетски крој, совршено ѝ прилегаше, додека нејзиниот Sabyasachi дијамантски ѓердан додаде уште поголема елеганција. Курт остана верен на класиката со беспрекорен црн смокинг, бела кошула и црна машна, правејќи го нивниот моден момент безвременски.

Лиса (BLACKPINK) во Alexander McQueen

Лиса ја редефинираше машко-женската мода со овој црно-бел костум од Alexander McQueen. Долгото сако, кошулата со големи манжетни и црвениот цвет како моден акцент ѝ дадоа апсолутно неприкосновен стилски момент.

Ел Фенинг во Balmain

Ел Фенинг беше вистинска модна визија во оваа ретро инспирирана бела чипкана тоалета од Balmain, заокружена со совршено поставена црна панделка на половината. Овој аутфит беше нежен, безвременски и суптилно драматичен. Комбинацијата со елегантна пунџа и дијамантско ѓерданче беше совршен спој.

Мајли Сајрус во Maison Margiela

Мајли Сајрус го донесе најсмелиот гламур на вечерта со оваа ултра драматична црна тоалета од Maison Margiela, украсена со светкави рачни везови и гранџ деталите кои совршено го отсликуваат нејзиниот стил. Рачно везените чипкани ракавици, пуштената брановидна коса и смелите тетоважи создадоа совршен баланс меѓу гламур и рокерски шик. Ова беше еден од најнезаборавните аутфити на вечерта!

Модата е уметност, а овие ѕвезди вчера беа нејзиното платно.

Црвениот тепих на овогодинешните Оскари ни донесе многу различни стилови, од класичен гламур до авангарда, од минимализам до чист ексцес.

Ова беа моите фаворити, аутфити што ме натераа да фрлам поглед неколку пати и да ги изанализирам од секој агол.

Аутфити што не само што беа визуелно совршени, туку носеа и приказна со себе.

Кој е твојот моден фаворит? Пиши ми во коментарите, сакам да знам кој ти остави најголем впечаток!

Искрено ваша,

Лори ✍

Read more

March 02, 2025

Вида Верде: Веганскиот мини маркет во Скопје што го чекавме! 🌱✨

Дали некогаш сте посакале место каде што можете да пазарите без да ги вртите пакувањата на сите производи во потрага по несакани состојки?

Дали сте веган, вегетаријанец, постите или едноставно сакате да го збогатите својот начин на исхрана со етички и здрави производи?

Ако одговорот е „да“, тогаш имам одлична вест за вас – Вида Верде е тука!

Ова уникатно катче во Скопје не е обичен маркет, туку вистински рај за сите кои внимаваат што ставаат на својата трпеза. Основано со љубов и визија, Вида Верде е мал бизнис со голема мисија: да овозможи лесен пристап до вегански производи во Македонија.

А најубавиот дел? Зад овој прекрасен проект стои мојата драга Маги Михајловска – девојка која ја запознав преку Инстаграм следејќи ги нејзините вегански рецепти кои редовно ги објавуваше, а низ времето толку многу се поврзавме што станавме блиски пријателки.

Обожавам да гледам како таа е целосно посветена на својот бизнис и ми претставува секојдневна инспирација кога ќе видам како со огромна љубов го гради Вида Верде, се со цел да го направи веганскиот начин на живот подостапен за сите.

Што го прави Вида Верде посебен?

✅ 100% вегански производи – Заборавете на долгите проверки на декларации, тука сè е без животински состојки!
✅ Идеален избор за сите што постат – Совршено време за посета, бидејќи утре започнува големиот Велигденски пост.
✅ Простор со поразличен концепт – Мини маркет кој не личи на останатите, со топла и пријатна атмосфера.
✅ Погоден и за вегетаријанци – За сите кои сакаат здрави и етички алтернативи во исхраната.

Со оглед на големиот интерес, наскоро се очекува и достава преку Волт, што ќе го направи пазарењето од Вида Верде уште поедноставно!

Поддржете ја оваа прекрасна иницијатива и помогнете во развојот на локалната веганска сцена – посетете ја Вида Верде и откријте нови омилени производи!

📍 Локација: Максим Горки 8/8, Скопје
📲 Следете ги на Instagram: @vidaverde.mk

Кој е вашиот омилен вегански производ? Споделете во коментарите! 🌿💚

Искрено ваша.

Лори ✍

Read more

February 28, 2025

Running Point, Кејт Хадсон и женското лидерство...

Завчера ја објавија, а веќе денес успеав да ја завршам со гледање првата сезона од новата Нетфликс серија со Кејт Хадсон, Running Point, и… вау – каква јака серија! Во серијава Кејт има многу јака boss lady улога. Таа е претседател на кошаркарскиот тим Waves од Лос Анџелес, жена што доминира, знае како да носи одлуки и да го води тимот кон успех. Нејзиното семејство е сопственик на тимот, но да бидеме реални, таа е таа што ги влече конците. Самоуверена, стратешки ориентирана, цврста… но она што најмногу ме фасцинираше? Таа води со срце.

Ова ме натера да се подзамислам и да си направам еден краток муабет сама со себе.

Долго време гаев мислење дека ние жените не сме баш предодредени за да бидеме добри лидери, ниту пак менаџери. И да, овој заклучок е воглавно базиран од микс на сопствени искуства, туѓи впечатоци и слушнати еден куп негативни муабети низ годиниве. Не велам дека не сме добри лидери или менаџери затоа што ни недостасува интелигенција или вештини, туку едноставно сметам дека имаме еден голем вроден недостаток како пол, а тоа е дека премногу чувствуваме. Кога ќе дојде момент за донесување тешки одлуки, емоциите многу често знаат да ни ја замаглат проценката. Или барем, вака мислев до скоро...

Но, во последниве 7, 8 месеци сфатив нешто многу важно.

Сфатив дека тоа што до скоро го сметав за маана, всушност е нашата супермоќ. Емоциите не се слабост, туку предност. Да бидеме реални, не сите жени се родени да бидат лидери и менаџери, исто како што не се ни сите мажи. Но оние жени што ја имаат таа лидерска искра во себе, поседуваат уште нешто екстра - емпатија, природно чувство за разбирање на луѓето и способност да ја балансираат амбицијата со грижа.

Да го земеме спортот како пример поради серијава со Кејт Хадсон. Таткото на Кејт во серијата бил претседател на кошаркарски тим пред ненадејно да почине. Во неколку наврати ликот на Кејт ни се обраќа нам гледачите и ни раскажува за тоа како нејзиниот татко гледал на играчите само како бројки, редовно ја притискал нивната граница на издржливост, се со цел по секоја цена да се победи на секој натпревар. Вистинскиот лидер, односно во случајов ликот на Кејт Хадсон, е лидерот кој сочувствува, знае и чувствува кога треба да притисне, а кога да се воздржи или повлече. Знае кога играчот има потреба од дополнителен поттик за потполно да го реализира својот потенцијал, и кога повлекувањето од игра на истиот, во крајна линија, може да му ја спаси кариерата, иако тоа на играчот првенствено нема да му се допадне.

Истото важи и за било кое друго работно место. Добра жена лидер не е онаа што ги потиснува своите емоции за да се вклопи во традиционалниот модел на лидерство. Таа е онаа што го користи ова, ја чита атмосферата, ги разбира предизвиците на својот тим, и донесува одлуки не само врз основа на логика, туку и на интуиција и длабоко разбирање.

Ќе повторам, не велам во ниту еден момент дека секоја жена ја бива да биде добар лидер и менаџер. Но оние што ги бива се токму тие кои ја користат паметно својата емпатија како супер моќ. Серијата Running Point ме потсети колку ова може да биде моќно.

А ликот на Кејт Хадсон? Едноставно предобар! Таа ги менува правилата на играта. Благодарение на нејзиниот лик и оваа серија конечно доаѓа до израз женската емоционална интелигенција онаква каква што навистина е: не како слабост, туку како лидерска вештина што прави огромна разлика.

Што мислите вие, дали емоциите помагаат или одмагаат кога сте на лидерска позиција?

Искрено ваша,

Лори ✍

Read more

February 01, 2025

Убаво е да се биде фин

Во свет каде што брзината на животот нè тера да заборавиме на малите, но важни нешта, финото однесување и љубезноста често се потценети. Но, токму тие ни го олеснуваат денот, ни ги прават средбите поубави и оставаат впечаток што трае. Да се биде фин не е слабост – напротив, тоа е моќ што ги отвора сите врати.

Замисли си го следново: некој ти ја држи вратата додека брзаш со кафе во рацете, касиерката ти возвраќа со насмевка кога ѝ се заблагодаруваш, а колега од работа ти вели „добро утро“ со искрено расположение. Овие мали моменти создаваат топлина и ја менуваат динамиката на денот.

Во свет каде што луѓето сè повеќе се фокусирани на себеси, љубезноста станува ретка и затоа толку многу значи. Да се насмееш некому, да понудиш помош без да се очекува возврат, да имаш убав збор за некој – тоа се гестови што можат да направат огромна разлика.

Фините луѓе секогаш оставаат позитивен впечаток. Нив ги паметиме и несвесно сакаме да бидеме во нивно друштво, бидејќи нивната енергија зрачи со топлина и добрина. Кога си фин, создаваш позитивна атмосфера околу себе, а со тоа ги мотивираш и другите да бидат такви. Односите стануваат поквалитетни, бидејќи љубезноста гради почит и разбирање.

Добриот збор или најмалиот гест на внимание може да го разубави денот на некого. Една насмевка, искрено „фала“ или едноставно слушање на соговорникот со вистинско внимание – сето тоа има моќ да создаде промена.

Во време кога светот изгледа груб и брз, убаво е да се биде фин. Тоа е избор кој го правиме секој ден – избор што не само што ги прави другите посреќни, туку и нас самите. Љубезноста не е привремена, таа остава трага и се враќа кога најмалку ја очекуваме. Затоа, да не чекаме повод, туку да почнеме веднаш – едноставно, со насмевка.

Искрено ваша,

Лори ✍️

Read more

January 29, 2025

Маркетингот, хаосот и семоќниот алгоритам

Постои една тајна за маркетингот за која ретко кој зборува: половина од времето – импровизираме.

Да, секако, нон стоп правиме истражувања, анализираме трендови и градиме стратегии. Внимателно составуваме content календари, пишуваме и креираме интересни објави кои се надеваме дека ќе "бодат очи" и го мериме секој пиксел од нашите Canva дизајни.

Но, на крајот од денот, искрена ќе бидам и ќе кажам дека голем дел од успехот зависи од тоа дали ќе го фатиме вистинскиот бран во вистинскиот момент—и дали алгоритмот ќе биде расположен да ни даде шанса за романса 😄.

Јавање на алгоритамскиот бран

Некои денови, чувствуваш како да си ја открил тајната на успехот. Објавата експлодира, интеракциите летаат, и одеднаш, убеден си дека си маркетинг гениј.

Други денови, ќе вложиш срце и душа во содржина што ја сметаш за совршена – и таа мистериозно исчезнува во длабочините на интернетот без речиси ниту еден лајк.

Без предупредување. Без логика. Само хаос.

Слично како кога се обидуваш да импресионираш мачка—еден ден те сака, а следниот те игнорира како да не постоиш. Таков е алгоритмот.

Среќа vs. стратегија: Каде е балансот?

Научив дека маркетингот е совршен баланс помеѓу стратегија и чиста среќа. Мораш да го знаеш пазарот, да ги следиш трендовите и да размислуваш однапред. Но во исто време, мораш да прифатиш дека понекогаш, успехот не е ништо повеќе од совршен тајминг.

Не си секогаш ти. Понекогаш, тоа е алгоритмот. И ако дозволиш тоа да те излуди, ќе останеш заглавен анализирајќи зошто една објава поминала добро, а друга не.

Што е вистинскиот план?

Клучот е да продолжиш да работиш, да се трудиш. Што би рекле Американците: "to show up", односно, да се појавуваш, да те има, да си присутен. Да експериментираш, да објавуваш, да се вклучуваш во разговори со маркетинг индустријата.

Не секоја објава ќе биде хит, и тоа е во ред. Бидејќи маркетингот не се гради на една совршена објава—туку на континуитет, на нови бранови, на упорност.

А еве ми ја вистинската поента на муабетов: Конзистентноста победува над совршеноста.

Алгоритмот може да биде непредвидлив, но вистинскиот успех доаѓа кога се појавуваш (when you show up), кога си присутен и те има, даваш вредност на секоја објава, секој пишан збор, секој креиран дизајн и остануваш автентичен.

Никој не памети само една вирална објава—брендот се гради кога постојано си тука, присутен,  без разлика што велат бројките денес.

Затоа, ако некогаш почувствуваш дека немаш поим што правиш, само сети се: ни алгоритмот нема поим. А сепак, некако, сите опстојуваме.

Искрено ваша,

Лори ✍️

Read more