January 02, 2022

20-годишнина на Хари Потер: Враќање во Хогвортс

Лондон. Tower bridge. Улици украсени за божиќните и новогодишните празници. Такси автомобил.

Актерите ги добиваат своите писма од Хогвортс кои им кажуваат дека е дојдено времето за повторно обединување.

⚡⚡⚡⚡⚡⚡⚡⚡⚡⚡⚡⚡⚡⚡⚡⚡⚡⚡⚡⚡⚡⚡⚡⚡⚡⚡⚡⚡⚡⚡

Ова беше нешто што им требаше на сите Хари Потер обожаватели. Последниве неколку години не беа воопшто идеални за љубителите на како што сега се нарекува: франшизата "Волшебничкиот свет".

Филмот "Фантастични ѕверови", беше прв обид за Хари Потер приквел и беше доста добро прифатен филм од ХП фановите, но вториот дел од приквел серијалот беше права турлитава.

Доколку сте Хари Потер фан, треба дефинитивно да ја погледнете оваа специјална епизода наречена: „Враќање во Хогвортс“.

Навистина ми го врати она топло, смирувачко чувство, кое може да го разберат само оние што ги гледале филмовите за младиот волшебник, за прв пат додека биле деца.

Во оваа специјална епизода долга час и половина, освен триото составено од Даниел Редклиф, Ема Вотсон и Руперт Гринт, добиваме шанса да ги видиме и Том Фелтон, Марк Вилијамс, Хелена Бонам Картер, Гери Олдман, Роби Колтрејн, Џејсон Ајзакс, Џејмс Фелпс, Оливер Фелпс, Бони Рајт, Алфред Енок, Метју Луис, Евана Линч, Ралф Фајнс и други.

Секако, во фокусот на епизодата се најмногу толкувачите на главните три лика, но најинтересните приказни најчесто доаѓаа од страна на останатите актери од филмскиот екипаж.

Претпоставувам дека ова е можеби затоа што веќе премногу работи знаеме за Хари, Рон и Хермиона за да бидеме повеќе изненадени.

Многу ми беше интересно да ги слушам анегдотите на Роби Колтрејн, Џејсон Ајзакс, Гери Олдман, Хелена Бонам Картер, Метју Луис и Том Фелтон.

Наративот на целата епизода е така дизајниран да ја води публиката од филм во филм, што сметам дека е многу паметно изведено. Ова ми даде чувство на хронологија на повторното обединување, кое инаку би изгледало целосно неповрзано.

Монтажата е одлична и очигледно е дека се вложени многу средства за целата епизода да изгледа беспрекорно.

Ова е новогодишен подарок од волшебничкиот свет до сите фанови на Хари Потер серијалот на филмови и книги.

Оваа прекрасна епизода имаше за цел да ми ги обнови старите спомени за мојата посета во Англија, каде ја купив послетната книга и ја имав таа чест да присуствувам на премиерата на последниот филм од Хари Потер серијалот.

Последните неколку сцени беа посветени во оддавање почит на актерите кои беа дел од снимањето на овој феномен од филмски серијал, а за жал веќе не се меѓу нас. Ова ја прелеа чашата и ме натераа да леам солзи како мало дете, посебно присеќавајќи се на брилијантните британски актери кои ги толкуваа улогите на Снејп и Дамблдор.

Би сакала топло да ви препорачам да ја погледнете оваа специјална reunion епизода и да и посветите дел од вашето драгоцено време.

Се што треба да направите за да ја гледате оваа епизода е да сте претплатени на HBO Go стриминг платформата.

За крај, ви оставам трејлер за специјалната ХП reunion епизода:

December 21, 2021

“Емили во Париз„ се враќа на Нетфликс со нова сезона!

Штотуку ја завршив втората сезона од мега популарната серија на Нетфликс - “Емили во Париз„ па решив да споделам со вас што мислам за неа.

Во првата сезона на "Емили во Париз" гледавме како Емили се приспособува на францускиот начин на живот во Париз, од говорењето многу слаб француски, па се до помирувањето со необичниот пристап на работа во луксузната маркетинг агенција Савоар.

Последните сцени од сезоната ни прикажаа како Емили конечно завршува со младиот и успешен chef Габриел, откако тој и кажува на Емили дека раскинал со својата девојка Камил и дека заминува назад во Нормандија каде планира да го оствари својот сон и да отвори свој ресторан.

Но, во меѓувреме Емили веќе разви мала романса настрана и со Матју Кадо, наследникот на луксузниот бренд Пијер Кадо, кој ја поканува Емили на романтичен викенд во Сан Тропе.

Втората сезона малку ја забрзува приказната, но не ја променува премногу.

Се уште можеме да видиме разни нијанси на трапавоста на Емили во однос на последиците од нејзините постапки, посебно во однос на нејзиното жалење за ноќта помината со Габриел.

Таа е решена да ги поправи работите помеѓу неговата, сега веќе поранешна девојка и добра пријателка на Емили - Камил. Оваа мисија уште од првата епизода има неколку дупки во планот, но сепак Емили прави се за овој нејзин план да успее.

Додека во првата сезона имавме прилика да го гледаме во прв ред турбулентниот работен однос помеѓу Силви и Емили, втората сезона ни прикажува дека овие две жени имаат многу повеќе разбирање една за друга.

Додека цинизмот на Силви ја мотивира Емили да работи понапорно од било кога, емпатијата и љубезноста пак на Емили ја тераат Силви да стане малку поотворена. Оваа синергија која се раѓа меѓу двете бизнис жени е право задоволство да се гледа и е нешто во кое може да се пронајде секој кој има/л колега со кој не стои на иста бранова должина.

Сепак, едно од најголемите задоволства да се гледа во оваа сезона е како Емили конечно се препушта на учењето на францускиот јазик и почнува многу посериозно да ги сфаќа приватните часови по француски јазик на кои присуствува секој ден по завршување со работните обврски во агенцијата.

Секако, за да биде се уште поинтересно, таа дури и стекнува пријател на часовите по француски јазик, а тоа е британскиот банкар Алфи, со кој по неколку епизоди пријателство испишува уште една љубовна романса и продолжува да се држи до својот план да биде подалеку од Габриел.

Секогаш директниот Алфи го оспорува нереалниот романтизам на Емили за Градот на светлината и зборува за тоа како репутацијата на Париз е права фасада, чад и огледала што продаваат нешто на луѓето што не е реално.

Морам да признаам дека ликот на Алфи многу ми се допадна и беше совршен додаток во оваа сезона кој ја разниша Емили и ја натера да биде поопуштена и спонтана, а не само фокусирана на својата работа.

Во оваа сезона како и во првата работите ретко остануваат мирни и стабилни кога станува збор за нашата хероина.

Фактот што брендот за шампањ на семејството на Камил, "Шампер", сега веќе соработува со Савоар прави приватните неволји на Емили да се прелеат и во нејзиниот работен живот, предизвикувајќи уште поголем хаос и на двете полиња.

Омилена ми беше изјавата што Силви и ја упатува на Емили уште во првата епизода: „О Емили, од ден на ден стануваш се поголема Французинка!„ - со која се исмева на целиот хаос кој постојано ја следи Емили.

Сакам накратко да се посветам на ликовите на Габриел, Камил и Минди.

Ако бевте фан на Габриел во првата сезона, втората сезона може да ве предомисли.

Неговата незаинтересираност и непромисленост за тоа колку ја повредил Камил крајно многу ме иритира. Секако, тој е зафатен со зацврстување на неговото бизнис партнерство со Антоан Лаво и отворањето на неговиот ресторан "Ше Лаво" во Париз, но сигурна сум дека никој не може да биде толку крут и невнимателен.

Разочарувачки, ликот на Камил се сведува на уште една девојка со скршено срце која пати по нејзиниот поранешен дечко. Таа штом ја дознае вистината за Емили и Габриел се претвора во одмаздољубива личност која глуми дека се е во ред и е непроменето.

Серијата конечно овозможува ликот на Минди да засјае во оваа втора сезона. Минди се бори да добие работна виза во Париз додека изнаоѓа разни начини да заработи пари само со нејзината патничка виза и без моралната и финансиска поддршка на нејзиното семејство. Таа успева да го пронајде својот глас и љубов, а нејзината приказна е една од моите омилени во новата сезона.

Како огромно изненадување во оваа сезона е појавувањето на ликот на Мадлин, големата шефица од Чикаго која остана бремена уште во првата сезона и на нејзино место ја испрати Емили да отпатува и биде претставник на Гилберт групацијата во Париз.

Таа ненајавено доаѓа да го провери прогресот на Савоар под водството на Силви. Ова е ситуација која ја става Емили во средина на една многу непријатна борба за моќ меѓу Мадлин и Силви. Оваа борба за превласт го доживува својот пик многу брзо и Емили е ставена пред свршен чин да направи избор кој ќе и го промени животот засекогаш.

Што Емили ќе одлучи останува да откриеме во третата сезона, доколку Нетфликс одобри истата да се снима во текот на идната година.

На многумина оваа сезона не им се допадна многу, но секако како и секогаш не дозволувам туѓите впечатоци да ми повлијаат во формирањето на мое мислење.

Мене оваа сезона многу ми се допадна. Како и во првата сезона, така и во оваа се изнагледав суптилен, но многу добар хумор, француски цинизам и целокупен животен стил на французите.

Па што повеќе треба да очекуваме од една ваква серија која е инспирирана од се она што претставува Париз и францускиот начин на живот?

December 09, 2021

Не е „Сексот и градот“ без Саманта

Ве молам доколку се уште не сте ги погледнале првите 2 премиерни епизоди од новиот reboot на добро познатата серија „Сексот и градот“ да не читате понатаму бидејќи ќе следат спојлери.

Ви благодарам 😊

Саманта - жената која беше најгласен борец, не смееше и изјавуваше мудри мисли како што е: „Бракот не гарантира среќен крај, туку само еден крај“, ми недостасува премногу!

Таа ми беше и до ден денес ми е омилениот лик од серијалот, затоа што беше целосно, автентично, своја.

Заминувањето на актерката Ким Катрал од серијата беше како едно замрсено клопче.

Искрено, очекував воопшто да не го спомнат ликот на Саманта, но бев пријатно изненадена што сепак на некој начин, барем во серијата го објаснија нејзиното заминување.

Секако слушајќи ги изјавите кажани за Саманта ме натераа да се подзамислам дали нешто што ликовите на Кери, Миранда и Шарлот го кажуваат во првите 2 епизоди е дел од оној "Живот имитира уметност" момент.

Кери признава дека ја отпуштила Саманта како нејзин агент, откако пазарот на книги попуштил. Саманта лично го сфатила пропаѓањето на бизнисот, се одселила во Лондон и ги заледила комплетно односите со нејзините три пријателки.

Во еден момент Кери и вели на Миранда: „Мислев дека ме гледа како повеќе од АТМ банкомат“.

Сепак, кога сопругот на Кери, Џон Џејмс Престон (или како милуваат сите во серијата да го викаат Ѕверката) ќе почине, Саманта и испраќа на својата долгогодишна пријателка венец од цвеќиња кои ќе лежи поставен врз ковчегот на Џон за време на целата церемонија. Со венецот дојде и порака од Саманта до Кери со која на некој начин серијалот симболично ни кажува дека двете жени се уште се тука една за друга, посебно во моментите кога им е најтешко.

Без Саманта, серијата очајно се обидува да ја пополни огромната дупка со додавање на нови членови во актерската екипа.

Колку што можев јас да заклучам, причината за проширувањето на актерската екипа не е само поради заминувањето на Саманта, туку и поради фактот што оригиналната серија како што многу милуваа да кажат била "нереално бела", па така неколку жени во боја добија улога во продолжението.

Јас пак често сакам да ја користам оваа америчка фраза - „Немој да го поправаш она што не е скршено“.

Истата важи и во случајов. Не разбирам зошто креаторите на серии и филмови во последниве неколку години упорно ни наметнуваат или подобро кажано форсираат да голтаме разни нијанси на диверзитет и инклузивност?

Како да чувствуваат некоја постојана грижа на совест, па мораат да вклучат актерски екипи од секаков калибар во своите серии и филмови, без разлика дали ги бива или не, само за да пробаат да ја закрпат дупката од фактот што белата раса со децении наназад негувала ужасен третман кон останатите раси.

Секако, во ред е да има различности, на крајот на денот, тие и не прават посебни и уникатни, но сметам дека треба режисерите, односно креаторите на вакви серии и филмови да научат дека децениски погрешни постапки и третмани не можат да се надокнадат преку ноќ.

Се треба да се движи постепено, со време, да еволуира, да расте и да се менува.

Во завршниот дел, би сакала да се навратам на нешто што го начнав малку погоре, а тоа е смртта на Ѕверката.

Морам да признаам без никаков срам дека плачев. Плачев толку силно и одеднаш за најлошиот дечко на ТВ екраните.

Некако ми делува како серијата повеќе да се грижи и да обрнува внимание на губењето на естетиката на она што Кери и Ѕверката претставуваа како пар, отколку за губењето на еден од клучните ликови како што е Ѕверката, како човеково битие.

Кога Џон умира, Кери трча кон него под тушот, каде тој седи потпрен на ѕидот од туш кабината, држејќи ја едната рака на срцето, камерата зумира на сините Маноло Бланик стилето чевли на Кери кои пополека се дават и уништуваат во водата. Тоа беа оние истите стилето чевли кои Кери ги носеше за време на нивната венчавка во првиот филм.

Ова беше една од глупавите метафори кои го симболизираа крајот на еден токсичниот брак. Но, сепак, не останав имуна и заплакав силно за крајот на една љубовна ера.

Со ова во овој нов reboot се овозможува Кери да не чувствува потреба дека треба да ја игра улогата на некоја: „среќни до крајот на животот фантазија“ - како во "Сексот и градот 2", туку може да биде едноставно - Кери.

Проблематична, непромислена и плитка Кери...