May 06, 2023

Крунисување на Неговото Височество: Господе чувај го Кралот!

Денес многумина од нас бевме сведоци на испишаното ново поглавје во светската историја.

На моменти се чувствував како да требаше да се штипнам себе си за да се осигурам дека сето ова навистина се случува внатре во најубавата Вестминстерска опатија.

Ме фати некоја тага и носталгија за Лондон, за Вестминстер... 

Додека чекав пред ТВ екранот Велика Британија конечно после 70 години да го добие својот нов крал и кралица, мозокот ми вртеше еден куп спомени од времето кога за прв пат стапнав во Вестминстер и не можев да престанам да се воодушевувам на нејзината убавина и историјата која е врежана длабоко во нејзините темели. 

Искрено, за момент посакав да сум таму, посакав да исчезнам од тука и веднаш да се транспортирам таму, меѓу огромната толпа луѓе и да уживам во овој ден.

Токму денес, на олтар полн со свеќи, молитви и златен сјај, Вестминстерската опатијата изгледаше како да си залутал во некоја кутија со скапоцени камења, каде владееше беспрекорен раскош.

Пред 2.300 гости, кралот Чарлс и кралицата Камила поминаа низ древните ритуали, со доза модернизам и разноликост. 

Меѓу гостите имаше членови на кралското семејство и други членови на кралските семејства ширум светот, претставници од домовите на парламентот и црквата, како и истакнати политичари од Комонвелтот и пошироко.

Бројот на поканети е всушност релативно мал, имајќи предвид дека повеќе од 8.000 луѓе присуствувале на службата на кралицата во 1953 година.

Церемонијата се одржа на 6 мај - повеќе од осум месеци по смртта на кралицата Елизабета Втора и непосредно пред 70-годишнината од крунисувањето на кралицата. Иако покојната кралица пристапи на тронот на 6 февруари 1952 година, таа беше официјално крунисана дури на 2 јуни 1953 година, по период на национална жалост за нејзиниот татко, кралот Џорџ Шести - традиција што кралот Чарлс избра да ја следи. 

Гостите почнаа да пристигнуваат во Вестминстерската опатија од 9 часот наутро, а поворката на кралот Чарлс Трети тргна од Бакингемската палата во 10:20 часот.

Церемонијата на крунисување потоа започна во 11 часот и мина без никакви проблеми.

Покрај кралот Чарлс Трети и кралицата Камила, целото Велс семејство беше присутно на крунисувањето, а принцот Џорџ ја имаше честа да биде дел од церемонијата и да ја придржува наметката на кралот заедно со уште три други момчиња.

Принцезата Шарлот и принцот Луи беа исто така присутни меѓу гостите. По завршувањето на службата за крунисување, Џорџ повторно се соедини со остатокот од неговото семејство и им се придружи во црно-златна кочија за поворката за крунисување назад во Бакингемската палата која заврши точно во 01:00 часот попладне.

Војводата од Сасекс исто така беше меѓу присутните, заедно со принцезите Јуџини и Беатрис, придружувани од нивните сопрузи. Хари држеше доста низок профил, што беше и очекувано, додека војвотката од Сасекс остана дома во Калифорнија со принцот Арчи и принцезата Лилибет.

Кралските деца потоа ги следеа кралот и кралицата додека го изведуваа традиционалното отпоздравување на главниот балкон на собраната толпа народ пред Бакингемската палата.

Додека Чарлс и Камила и мавтаа на толпата, принцот Луи донесе момент на забава преправајќи се дека свири на имагинарно пијано 😄.

На 21 јануари, Бакингемската палата објави дека ќе има концерт по повод крунисувањето во замокот Виндзор на 7 мај, на кој ќе се соберат нови уметници и светските музички икони за да ја одбележат оваа пригода. Ним ќе им се придружи оркестар, танцови трупи, актери од А-листата и хорот од церемонијата, составен од пејачи аматери од целата земја, на кои ќе им се придружи виртуелен хор составен од вокали базирани низ Комонвелтот.

Кети Пери, Лајонел Ричи, Андреа Бочели, Фреја Рајдингс, Никол Шерцингер, Палома Фејт, Тива Севиџ, Оли Мурс и Тејк Дат се подготвени да настапат за толпа од околу 20.000 луѓе во замокот Виндзор.

Се беше спектакуларно, како уште една раскошна венчавка, со пријатели, семејства и познати лица кои си играат со своите телефони и прават селфиња за да го комеморираат овој посебен момент.

Беше ден за памтење...

Доколку немавте прилика да ја погледнете целата церемонија, а имате желба тоа да го сторите, веднаш под ова ќе ви оставам линк до преносот на Јутуб каналот на Кралското семејство:

Read more

May 03, 2023

Мет Гала 2023: Што се носеше на after забавите?

Ѕвездите го изнесоа своето најдобро на црвениот тепих на овогодинешната Мет Гала која му оддаде почит на животот и креативното наследство на покојниот Карл Лагерфелд. Но, најголемата модна ноќ не заврши тука. Outfit-ите на познатите станаа уште похрабри кога камерата ги начека како позираат на неколку прослави кои следеа по завршувањето на галата.

Гостите излегоа од Метрополитен Музејот на уметноста во срцето на Њујорк за да ја продолжат серијата драматични промени на гардероба, па така моето око улови 10 афтер-изгледи кои многу ми се допаднаа и решив да ги споделам со вас.

Очекувајте макси фустаните да се претворат во мини фустанчиња и сукњички, смокинзите да се претворат во кошули со опуштени копчиња и фармерки, а светкавото да се претвори во мрежесто.

Погледнете ги 10-те изгледи кои мене ми оставија најголем впечаток:

Кери Вашингтон облечена во Мајкл Корс на Мет Гала афтер забава.

Коко Роча на афтер забавата во The Mark.

Томас Доерти на афтер забава во Loosie's.

Џена Ортега на афтер забавата во Standard.

Клои Фајнмен афтер забава во Standard.

Тина Леунг на афтер забава во Standard.

Коко Роча на афтер забава во Standard.

Оливија Родриго на афтер забава во Standard.

Џиџи Хадид на афтер забава на Стела Макартни, Баз Лурман и Казамигос во Zero Bond.

Кејт Хадсон на афтер забава на Стела Макартни, Баз Лурман и Казамигос во Zero Bond.

Едвај чекам до следната година да видам какви се креации ќе носат познатите и која ќе биде тематиката.

Read more

May 02, 2023

Мет Гала 2023: Во чест на Карл

Мет Галата се одржа на првиот понеделник од месец мај. 

Честопати наречен „Оскари на модата“, настанот ги привлекува најголемите имиња од А-листата, кои се облекуваат според дадена тема, обично во креации нарачани од највлијателните светски модни куќи.

Оваа година Мет Галата претставуваше прослава на покојниот великан Карл Лагерфелд, а неговите пријатели и соработници му оддадоа почит на дизајнерот на многу начини.

Легендарниот дизајнер за жал почина во 2019 година, на 85-годишна возраст. Тој беше еден од најплодните и најславните модни дизајнери на сите времиња и беше на чело на некои од најголемите модни куќи во светот, вклучувајќи ги Фенди, Шанел и неговата истоимена етикета и беше во улога на креативен директор се до неговата смрт.

Додека некои теми на Мет Галата може да бидат незгодни за интерпретација и можат да се прикажат и суптилни и смели сфаќања на идејата, темата за овој настан беше кристално јасна, па така некои познати личности носеа винтиџ дизајни изработени од самиот дизајнер, додека пак други носеа креации кои беа инспирирани од неговата естетика, изработени од ривалски модни куќи кои дадоа свој осврт на некои од неговите најпознати дела.

Голем број гости избраа да му оддадат почит на дизајнерот навлегувајќи во архивите и носејќи една од неговите креации. Никол Кидман, Наоми Кембел, Дуа Липа и Жизел Бундхен беа меѓу оние кои носеа винтиџ Шанел.
Воглавно тоа беше црвен тепих исполнет со монохроматски изглед, каде доминираа црно-бели креации.

Драги мои, за вас ги одбрав моите 10 омилени изгледи од Мет Галата:

Ен Хатавеј во Версаче

Жими се вака кога ја гледам Ен веднаш си замислувам дека е повторно во улогата на Енди од Ѓаволот носи Прада! Оваа жена изгледаше толку моќно на црвениот тепих што ми го одзеде здивот. Не само што ја погодила тематиката на самиот настан, туку и успеа да ме шокира со фактот дека креацијата која ја носи е од модната куќа Версаче, а не од Шанел како што првично ми оддаде впечаток со тој познат твид материјал по кој е препознатлив тој бренд.

Никол Кидман во винтиџ Шанел

Мет Гала не е само за да изгледате добро, туку и за раскажување приказна со вашиот ансамбл, а Никол Кидман можеби ја имаше најдобрата приказна на вечерта. Актерката ја носеше модната тоалета на Шанел што првпат ја носеше во 2004 година кога глумеше во таа прекрасна реклама за Шанел бр. 5 парфемот во режија на Баз Лурман. Оваа нежна бејби розе креација на нејзината вита фигура изгледа како милион долари, права елеганција во движење.

Лили Колинс во Вера Ванг

Мојата Емили од Париз ме освои со оваа Вера Ванг креација. Актерката Лили Колинс носеше впечатлив фустан од дизајнерката кој е составен од бело елече и лелеаво црно здолниште, со натписот „Карл“ сошиен на самиот тул. Можеби навидум обичен изглед, но според мене целосно on point кога станува збор за темата на настанот.

Наоми Кембел во винтиџ Шанел

Мет Галата беше совршена ноќ за носење малку винтиџ Шанел, а Наоми Кембел му кимна со главата на Карл Лагерфелд со тоа што излезе во една од неговите сопствени креации. Таа избра розова сатенска тоалета со украсни детали од модната колекција пролет/лето 2010 на Шанел, која беше шик и елегантна. Секогаш паѓам на розова боја така што не е ни чудно што баш овој изглед се најде меѓу моите 10 омилени од галата.

Жизел Бундхен во винтиџ Шанел

Манекенката се појави на Мет Галата соло, тазе разведена и ја истакна својата витка фигура во фустан со бел свилен тул и долга наметка Шанел украсена со пердуви и камелии. Нејзиниот фустан и наметка се исто така винтиџ и се дел од колекцијата на Chanel Haute Couture пролет-лето 2007 година.

Дуа Липа во винтиџ Шанел

Дуа беше една од ко-домаќините на настанот па секако се погрижи сите погледи да бидат вперени во неа кога буквално издоминира како права принцеза на црвениот тепих во винтиџ Шанел. Фустанот кој го носеше првично беше дел од колекцијата есен/зима на Шанел во 1992 година, дизајнирана од покојниот Лагерфелд.

Роџер Федерер во Диор

Тениската ѕвезда и ко-домаќин - Роџер Федерер со детали го почести Карл Лагерфелд и темата на самата Мет Гала.

Федерер рече дека неговата интерпретација на темата е да се држи до класиката, со дополнително значење одвнатре. Поставата на неговата јакна Диор имаше скици од Ким Џонс, во чест на преферираниот креативен метод на Лагерфелд.

„Цртежите се во чест на тоа како Карл скицирал. Искрено, ова беше прекрасен процес. Но, тоа е веројатно најмногу што сум размислувал за облека“, рече тој на црвениот тепих.

Џаред Лето како мачката Шупет

Пресладок ми беше кога се појави како мачката на покојниот Карл Лагерфелд по име Шупет! Ја симна маската и на сите фотографи им кажа: C'est Moi, Choupette!

На актерот Џаред Лето секогаш може да се потпреме за да испорача некои од најлудите изгледи на Мет Галата, но тој навистина се надмина себеси оваа година. Имаме среќа што реши да ја отстрани својата маска додека позираше за фотографии или можеби никогаш немаше да дознаеме дека е тој.

Џена Ортега во Том Браун

Додека Ортега носеше светло розев фустан од Валентино на минатогодишната Мет Гала, овој пат таа беше изразито пострашна и поготски настроена.

Нејзиниот мрачен ансамбл одговараше на естетиката на Лагерфелд, но исто така ја одразуваше и главната улога на Ортега како Среда, од исклучително успешниот спин-оф на семејството Адамс на Нетфликс.

Ким Кардашијан во Скиапарели

После ланското фијаско каде што буквално беше уништен винтиџ фустанот кој беше носен од страна на Мерлин Монро, оваа година Ким конечно изгледаше како што и доликува на нејзиниот стил и фигура. Облечена целосно во склад со темата на настанот, во креација на која и биле потребни повеќе од 1.000 часа за да се создаде, бидејќи секој прамен бисери бил нанижан и завиткан на телото. Кардашијан го дополни изгледот со чокер, бисерни обетки, набраздени ракави кои се влеваат во долг тул и потпетици од слонова коска.

Тоа беа 10-те изгледи кои ми оставија најмногу впечаток на Мет Галата.

Read more

April 04, 2023

Сузи Боналди го спасува денот!

Попозната под името на нејзиниот канал на Јутуб - Hello October (подоцна преименуван во Suzie Bonaldi), таа е една од првите блогерки кои се појавија пред 10-тина и повеќе години и ми беше права инспирација јас да се одлучам за прв пат да го креирам овој блог.

Сузи Боналди е 30 и нешто годишна девојка од Брајтон, Англија која ја започна својата кариера како блогерка, а подоцна се пробива на Јутуб сцената со својот канал и дневни влогови, каде го споделува својот секојдневен живот со своите гледачи, или споделува посебни видеа посветени на убавина, мода, патувања, отпакување на ПР пакети и сл.

Ќе се прашате што ми текна баш за оваа девојка денес да напишам објава?

Искрено, Сузи ја следам со години на Јутуб и и бев верен читател на нејзинот блог додека редовно постираше.

Настрана од ова, навистина е штета што блогерството со години веќе некако изумира, но еве ме мене сеуште не се давам и сеуште верувам во неговиот опстанок.

Па така утрово додека се спремав за да одам на работа и си ги терав оние мои утрински ритуали, обожавам да си пуштам влогови од Сузи на Јутуб да течат во позадина додека се спремам, случајно го фатив моментот каде што девојката кажува дека има подкаст и дека нема постирано ништо од месец октомври минатата година и сака повторно да се охрабри и да снима нова сезона од нејзиниот подкаст.

Јас бев во шок како оваа девојка ја следам со години и години, а не сум успеала да го фатам овој момент дека таа има свој подкаст, па таква каква што ме дал Господ, право рчкало, го отворив мојот Спотифај профил и веднаш во пребарај прозорчето го внесов името на нејзиниот подкаст „Thirty Something Drama Queen“.

Ми излегоа точно 10 епизоди и си реков да побрзам да стигнам на време на работа и штом го отворам лаптопот и почнам со работа, наместо музика, сакам овој подкаст да ми оди на слушалките во позадина додека работам.

Сузи има прекрасен глас за подкаст, буквално те смирува и ти раскажува за еден куп лични работи со кои се соочувала низ годините, најчесто во 20-тите години од нејзиниот живот, но исто така често раскажува за фактот како е да се стигне до 30-ката како една жена, какво е чувството кога имаш 30 години и како општеството те третира штом го достигнеш тој milestone.

Зборува за врски, било кратки, било долги, состаноци со разни момци и слично. Искрено, не може а да не се пронајдете, барем јас успеав поприлично многу да се препознаам во неа, па точно знам за што зборува и како се соочила со некои работи и излегла како прав победник на крајот.

Па еве ме... целосно спружена на мојот двосед во дневна, покриена со ќебе бидејќи Април сеуште не одлучил што сака да биде кога ќе порасне - Зима или Пролет...лаптопот во скут, џин тоникот во рака и како што го куцам по тастатурата текстов така си ја слушам седмата епизода од овој подкаст и буквално уживам.

Како да не го споделам ова уживање со вас? 💻

Доколку до сега не сте слушнале за оваа прекрасна англичанка со шпанско потекло сега е времето да го отворите нејзиниот Јутуб канал и подкаст и да ја заследите.

---->   Линк до Јутуб каналот на Сузи Боналди   <----

---->   Линк до подкастот на Сузи Боналди на Спотифај   <----

Read more

April 04, 2023

Мистериозно убиство 2 - повеќе акција, помалку хумор?

Во првиот филм кој се појави на Нетфликс стриминг платформата во 2019 се запознаваме со комичниот пар, полицаецот од Њујорк Ник и неговата сопруга Одри, или попознати како Спицеви, кои решаваат мистериозно убиство (по јасен не можел да биде насловот на филмот!) во стилот на Агата Кристи додека се на долго очекуваниот меден месец. Филмот беше вистинско уживање за гледање, во голема мера благодарение на хемијата меѓу двајцата главни актери и долгогодишни пријатели - Адам Сендлер и Џенифер Анистон.

И покрај тоа што првиот дел беше мега успешен проект на Сендлер, сепак тој како да решил да го надмине својот прв филм не со повеќе хумор, туку со еден куп акциони сцени. Никој не очекува да ги види овие двајца актери да се борат со негативци во комбе што опасно брзо вози низ париските улици, а пак најмалку очекував да ги видам како едниот од нив буквално виси од Ајфеловата кула.

Секако, јасно ми стана дека хуморот ќе мора да трпи кога има волку многу акција скоцкана во 90 минути.

Мистериозно убиство 2 започнува со потсетник за тоа што сме гледале во првиот дел, а потоа ни дава мал апдејт за тоа што се им се случувало на Спицеви од кога се вратиле од нивниот меден месец.

Спицеви даваат отказ од своите работни места и решаваат да отворат своја приватна детективска агенција, која не им носи нешто многу пари. Не долго потоа, тие се поканети на свадбата на Махараџата, нивниот богат пријател од претходниот филм, и ќе отпатуваат на неговиот приватен тропски остров. 

Махараџата им ја претставува својата прекрасна француска свршеница, Клодет, која можеби ќе ви изгледа познато, бидејќи оваа актерка ја глуми сопругата на Антоан, бизнис партнерот на Габриел во добро познатата серија - Емили во Париз.

Меѓу другите гости се и нејзината најдобра пријателка, грофицата Секу, која претходно била свршена за Махараџата, помошнчката на грофицата Имани, сестрата на Махараџата, Саира, Ренди Франциско, пензиониран познат фудбалер кој се пушта на секоја жена што се движи и намибискиот полковник Уленга, кој освен што претходно изгубил рака и око, го изгубил и остатокот од раката уште од првиот филм.

Непотребно е да се каже дека скоро сите од нив завршуваат како осомничени кога Махараџата ќе биде киднапиран, со барање за откуп од 50 милиони долари. Тука на помош доаѓаат агенти на МИ6, со нивниот лидер по име Милер, кој како што Одри и Ник објаснуваат го напишал детективскиот водич што тие го проучувале при лансирање на нивната агенција.

На крајот, сите патишта водат до Париз. Таму Спицеви повторно се сретнуваат со инспекторот Делакроа, чија главна занимација му е да дува совршени прстени од чад додека пуши цигари, и чека Одри и Ник да му го решат случајот... повторно.

Па да не откривам повеќе спојлери, ќе ве оставам вие сами да дознаете што се ги чека Одри и Ник во Градот на Светлината.

За крај, сметам дека вториот дел од сега веќе франшизата Мистериозно убиство, ќе биде уште еден хит на Нетфликс. Само се надевам дека во следниот дел ќе се фокусираат помалку на продукциските вредности, а повеќе на самата приказна и хуморот.

Доколку сеуште не сте ги погледнале двата дела од Murder Mystery, топло ви препорачувам тоа да го направите овој викенд и да уживате во доза добар амерички хумор и солидна доза на акција.

Read more