March 17, 2024

Оскари 2024: 10-те најдобро облечени дами на црвениот тепих

За најголемата ноќ во Холивуд како и секоја година на црвениот тепих пред Долби театарот се прошетаа гламурозно облечени дами во разни тоалети од познати дизајнери. Оскаровската вечер беше исполнета со драма на црвениот тепих и дојде како вистински шлаг на тортата на уште една успешна сезона на награди.

Ве поканувам да ги погледнете моите топ 10 најдобро облечени дами на црвениот тепих на 96-тото доделување на Оскарите:

Зендаја во Armani Privé

Го обожавам речиси секој изглед на црвенот тепих кога е во прашање Зендаја. Таа е вистинска модна кралица секој пат кога ќе се појави на црвениот тепих.

Америка Ферера во Versace

Номинирана за Оскар и амбасадор на CoverGirl, Америка Ферера, изгледаше совршено во оваа барби розова тоалета која перфектно и ги истакнуваше облините.

Ања Тејлор-Џој во Dior

Оваа девојка одсекогаш ме воодушевувала со креациите кои ги носела на црвениот тепих, па и овој пат не беше исклучок. Ања уште еднаш ми покажа како се игра дамски гамбит на црвениот тепих на Оскарите во прекрасна Диор тоалета и ми го одзеде здивот.

Ема Стоун во Louis Vuitton

Ема Стоун... девојката која плени со својата оригиналност како на цвениот тепих така и надвор од него. Секогаш своја и уникатна, овој пат одлучи Оскарот да го прими во тоалета од модниот бренд Луи Витон.

Емили Блант во Schiaparelli

Блант можеби не победи во нејзината категорија, но ме освои со нејзиниот изглед на црвениот тепих како една од најдобро облечените дами на Оскарите во Schiaparelli тоалета со боја на шампањ.

Џулијан Хоф во Alexandre Vauthier

Водителката на „Танц со ѕвездите“ присуствуваше на Оскарите и издоминира облечена во креација на Александре Вотиер. На прв поглед изгледаше како да носи тоалета, но по повнимателна проверка, всушност сфатив дека таа е облечена во комбинезон без прерамки.

Шарлиз Терон во Dior

Атомската плавуша беше беспрекорна на црвениот тепих. Едноствана, а сепак гламурозна во креација на Диор.

Џоди Фостер во Loewe

Фостер беше права визија во тоалета со темно сина боја која потсетува на ѕвездено небо. Номинирана за нејзината улога во Nyad, ова беше првиот пат Фостер да биде номинирана по нејзината номинација во 1995 година за најдобра актерка за нејзината улога во Nell.

Британи Сноу во Monot

Прекрасната Британи на црвениот тепих се појави во жолта тоалета од Монот без ракави во комбинација со златно-син накит. Британи е дел од актерската екипа на филмот Red, White and Blue кој влезе во трка за најдобар краток филм на Оскарите.

Хејли Стајнфелд во Elie Saab

Хејли Стајнфелд воодушеви на црвениот тепих на Оскарите, облечена во сина тоалета на Ели Саб со златни украси која имаше наметка до подот.

Тоа беа моите 10 најдобро облечени избранички кои издоминираа на црвениот тепих на овогодинешните Оскари.

Доколку сеуште не сте ја погледнале церемонијата на доделувањето на Оскарите која се емитуваше на 10-ти март, овде ви го прикачувам stream-от:

February 03, 2024

Гордон Ремзи: „Научете да танцувате за време на бурата“

Гордон Ремзи, готвач познат на глобално ниво по своите кулинарски умешности и остар јазик, неодамна се појави како прв гостин на подкастот „Good Trouble With Nick Kyrgios“, каде скоро 30 минути говореше за неговото животно патување, филозофија за успех и како успеал да ја искористи својата контраверзна персона како алатка за постигнување на тој успех.

Во епизодата слушателите добиваат ретка прилика да навлезат во умот на кулинарскиот титан, што е непроценливо искуство за секој што сака да дознае и разбере што се се мота низ главата на еден од највлијателните фигури во кулинарската индустрија денес.

Од фудбалски терен до Мишелин ѕвезди

Патот на Ремзи до кулинарскиот свет е една прекрасна приказна за страст, издржливост и непопустлив стремеж за извонредност.

Тргнувајќи со желба да создаде кариера во фудбалот, Ремзи се соочува со животен предизвик каде доживува сериозна повреда на коленото која ќе биде главниот виновник што ќе го одведе на патот до кулинарските води.

Во подкастот Ремзи зборува за тоа како дисциплината и одлучноста кои ги негувал на фудбалскиот терен успеал да ги канализира во немилосрдна потрага по кулинарско совршенство. Меѓу другото тој фрла посебен акцент на раните денови од неговата кариера, предизвиците со кои се соочувал при искачување низ кулинарските рангови и како ги заработил своите три Мишелин ѕвезди.

Филозофијата на Ремзи за контроверзиите и критиките

Еден од најинтересните моменти на подкастот е ставот на Ремзи за справување со критиките и контроверзите. Познат по својот огнен темперамент, Ремзи често беше трн во око на медиумите низ годините. Таквиот моментум тој го зема и искористува за да створи од себе си посилна личност, способна да креира една деловна империја каква што тој поседува денес.

Гордон Ремзи е човек кој милува константно да ги поместува границите и не се плаши од тоа да остане цврсто на своите ставови и верувања, дури и ако тоа значи дека ќе треба да се соочи со негативни реакции од јавноста. Оваа издржливост, како што споделува, била клучна за неговиот успех.

Човечката страна на кулинарска легенда

Покрај наградите и телевизиската слава, Ремзи ги открива своите ранливости и притисоците кои се секојдневие за јавна личност од таков калибар. Неговите размислувања за балансирање на семеен живот и кариера, справување со јавноста и останување доследен на својата страст за готвење оставаат длабок личен печат на неговиот наратив.

Ова е потсетник дека зад секоја успешна приказна се крие трнлив пат исполнет со многу препреки, носење тешки одлуки и упорност.

Споредбата со Ник Киргиос

Ник Киргиос, австралискиот рекет со грчко потекло, далеку познат по своите контроверзни моменти на тенискиот терен, но и надвор од него, се покажува како совршен домаќин за овој подкаст разговор.

Хемијата меѓу Киргиос и Ремзи е опиплива со тоа што и двајцата споделуваат свои искуства за справување со славата, критиките од јавноста и желбата да бидат најдобри во нивните области од интерес.

January 17, 2024

Galaxy AI настан: Претставување на новата Galaxy ера

Пред само неколку часа Samsung на својот Galaxy AI настан ги претстави многу очекуваните AI опции и алатки, заедно со најновата серија на телефони Galaxy S24.

Оваа нова серија ги вклучува моделите Galaxy S24 Ultra, Galaxy S24+ и Galaxy S24 кои означуваат значителен скок во мобилната технологија, посебно со воведувањето на Galaxy AI.

Оваа напредна интеграција на вештачка интелигенција најавува нова ера на мобилни искуства, трансформирајќи ја S серијата во футуристички алат кој ветува револуционерен начин на кој ги користиме нашите паметни уреди.

TM Roh, Претседател и директор на Одделот за Мобилно Искуство (MX) во Samsung, истакнува дека Galaxy AI е изграден врз едно богато наследство на иновации и длабоко разбирање на потребите на корисниците. Компанијата е возбудена да види како корисниците низ целиот свет ќе ја искористат моќта на Galaxy AI во своите секојдневни животи.

Револуција во комуникацијата и корисничкото искуството

Серијата Galaxy S24 ја редефинира суштината на комуникацијата. Функции како Live Translate и Interpreter прават надминувањето на јазичните бариери беспрекорно, овозможувајќи гласовни и текстуални преводи моментално.

Chat Assist ги усовршува конверзациските тонови во пораките и насловите на социјалните медиуми, додека Samsung тастатурата нуди моментален превод на повеќе јазици.

За возачите, Android Auto обезбедува резимирани пораки и предложени одговори кои може да ги искористите, без загрозување на безбедноста на возачот.

Покрај тоа, Note Assist во Samsung Notes и Transcript Assist додаваат дополнителна организација и ефикасност во фаќањето белешки и гласовните снимки.

Воведување на Circle to Search со Google

Значајна иновација во серијата Galaxy S24 е функцијата Circle to Search, развиена во соработка со Google. Оваа интуитивна алатка му дава можност на корисникот да гестикулира, односно да ја заокружува содржината која сака да ја пребара на неговиот екран, а со помошта на Гугл за неколку секунди ќе се изгенерираат резултати на истиот дел од екранот, без да треба да ве носи Гугл во нов таб на вашиот омилен веб пребарувач.

Засилување на креативноста со ProVisual Engine

ProVisual Engine во серијата Galaxy S24 е сведоштво за посветеноста на Samsung кон засилување на креативната слобода. Овој комплет на алатки поддржан од AI значително ги подобрува способностите за сликање и снимање, овозможувајќи на корисниците да прават јасни, стабилни снимки дури и кога го користите zoom-от.

Подобрените Nightography функции обезбедуваат брилијантни високо квалитетни фотографии и видеа направени во секакви услови, додека иновативните алатки за едитирање слики значително го олеснуваат овој процес и ви заштедуваат драгоцено време.

Напредна сигурност и приватност

Признавајќи ја важноста на сигурноста и приватноста, серијата Galaxy S24 е заштитена со помош на новиот Samsung Knox Matrix, кој претставува одбранбена мултислојна сигурносна платформа. Вака корисниците имаат целосна контрола врз нивните податоци, со опции за оневозможување на онлајн обработка на податоци за AI функциите.

Еколошка одржливост

Samsung продолжува со своето патување кон еколошка одржливост со оваа нова серија на Galaxy. Уредите содржат компоненти направени од рециклирани материјали, вклучувајќи пластика, стакло, алуминиум и за прв пат, кобалт и ретки земни елементи. Оваа иницијатива е во согласност со еколошките цели на Samsung поставени за 2025 година и понатаму.

Дизајн и перформанси

Серијата Galaxy S24 се гордее со забележителни подобрувања на дизајнот, нудејќи потенки рамки и поголеми големини на екраните. Уредите се управувани од Snapdragon® 8 Gen 3 Mobile Platform за Galaxy, оптимизиран за ефикасна обработка на AI. Серијата ветува врвно искуство, било за играње, снимање и едитирање на обемни видеа или мултитаскинг.

Ново поглавје во мобилната иновација

Со серијата Galaxy S24, Самсунг поставува нов бенчмарк во мобилната технологија, комбинирајќи прецизна инженерија со елегантен дизајн. Серијата нуди различни бои инспирирани од минерали на земјата, задоволувајќи ги различните естетски преференции.

За повеќе детални информации во врска со спецификациите и перформансите на новата S серија на Самсунг кликнете тука и дознајте се што ве интересира во врска со секој од моделите поединечно и како истите можете да ги пред-нарачате и да бидете едни од првите корисници во Македонија кои ќе ја искусат моќта на револуционерната Galaxy AI алатка.

Доколку сте љубопитни и сакате да го погледнете цел Galaxy AI настан кој се одржа денес, кликнете на видеото од live stream-от и уживајте!

* оваа објава не е спонзорирана од страна на Samsung.

January 10, 2024

Нетфликс ме однесе на патување "Под Тосканското Сонце"…

Како што се тркалаа филмските кредити и се слушаа последните ноти од саундтракот, се фатив себе си како размислувам за длабоката трага која овој филм штотуку ми ја остави.

"Под Тосканското Сонце"...

Издаден во 2003 година, овој кинематски скапоцен камен во режија на Одри Велс сигурно ги пробил срцата на многумина низ годиниве, нудејќи и на својата публика еден незаборавен наратив кој дури ги надминува границите и на едно обично раскажување приказни.

"Под Тосканското Сонце" ја грабнува својата публика и ја сместува директно во прв ред каде одблиску ќе ја искуси оваа трансформативна одисеја.

Во својата суштина, филмот е прослава на обновата, издржливоста и убавината која произлегува од прифаќањето на непредвидливите пресврти на животот.

Франсис Мејс (одиграна од брилијантната Дајен Лејн), публиката ја доживува како некое кајче, чии весла мораат константно да се борат со разните бранови за да кајчето може успешно да плови низ разните предизвици кои животот и ги приготвува.

Нејзиниот лик е неодамна разведена жена, која сеуште се бори со чувството на празнотија, а сепак еден ден се решава да тргне на едно храбро патување за да се самооткрие.

Нејзината непромислена одлука која ја донесува за купување на една порутена вила во срцето на Тоскана станува метафора за обнова на нејзиниот живот.

Живописната слика на пејзажите и шармантните вили напоени со сонце служат како позадина за метафоричното и буквалното реновирање што Франсис го презема. Невозможно е да не бидеш опиен од привлечноста на Тоскана, која директно ја одсликува опиеноста на нашата протагонистка од можностите кои и претстојат.

Зошто "Под Тосканското Сонце" толку длабоко резонира кај публиката е токму поради тоа што овој филм ги обработува едни од најбитните теми, а тоа е исцелување и давање втора шанса.

Патувањето на кое тргнува Франсис не е само симбол за физичко заздравување, туку симболизира емоционално и духовно подмладување кое многу од нас го бараат во сопствениот живот.

Филмот не потсетува дека понекогаш, точно во самата средина на животниот хаос, можат да ни се пружат најнеочекуваните можности за раст и самооткривање.

Споредната актерска екипа, вклучувајќи ги локални ликови и енигматичниот Марчело што го глуми Раул Бова, придонесуваат за богатата таписерија на филмот. Секоја средба остава трага во еволуцијата на Франсис, зајакнувајќи ја идејата дека убавината на животот лежи во нејзините непредвидливи врски.

Додека ја гледав Франсис како се прилагодува на предизвиците како соочување со нова култура и надминување на пречките, не можев а да не размислувам за сопствените искуства.

Филмот служи како нежно потсетување дека не треба да се плашиме од неизвесностите на животот, туку да ги пречекаме со раширени раце.

Како Франсис, и ние ја поседуваме моќта да ја испишеме сопствената приказна, страница по страница, константно чекорејќи кон нови поглавја исполнети со неочекувани пресврти.

Филмот успеа да ме расплаче и насмее неколку пати во текот на тие 2 часа траење. Ме натера да сочувствувам со главниот лик и да се ставам во нејзините чевли.

Ме потсети на уште едно вакво филмско ремек дело кое е воедно и еден од моите омилени филмови базирани на книга, а тоа е "Јади, моли се, сакај", во кој случајно се погодува главниот лик да е сличен на оној на Франсис.

Две јаки, борбени жени, кои умешно ги голтаат залаците на животот.

Доколку сте некој/а како мене кој/а воошто не чуле за филмов се дури не се појави одеднаш на листата на скоро додадени филмови на Нетфликс, тогаш ова е вистинското време да го погледнете.

Верувајте ми кога ви велам дека ќе уживате во секоја минута.

November 09, 2023

Колкава е веројатноста да ви се случи љубов на прв поглед?

На сите ни се случило, нели?

Вие сте на аеродром, гледате некој на ваша возраст и си помислувате дека тој или таа можеби се вашата сродна душа. Уште само универзумот да реши да игра на ваша страна и да ги принуди вашите седишта да бидат едно до друго и веќе имаме почеток на една интересна приказна.

Љубовта на прв поглед за повеќето е минлива фантазија.

Но, спротивното важи за ликовите на Хејли Лу Ричардсон и Бен Харди во „Љубов на прв поглед“.

Филмот, кој излезе на Нетфликс во месец септември, ги прикажува Хедли и Оливер, две слатки, тажни души кои се заљубуваат за време на еден трансатлантски лет.

Уште на самиот почеток нараторот го пушта во етер да лебди фактот дека 20ти Декември е најлошиот ден за летање низ меѓународниот аеродром Џон Ф. Кенеди во Њујорк поради голем број факти и бројки поврзани со празниците.

Па, во сред целата таа аеродромска гужва, после низа сплет на околности и статистики, нашата хероина Хедли 'решава' да задоцни само 4 минути и да го пропушти својот лет за Лондон и да налета на љубовта на својот живот.

Што би рекле англичаниве: 'What are the chances?'

Или во превод - која е веројатноста ова да му се случи на било кој од нас?

Верувале или не драги мои 60% од луѓето наводно доживуваат љубов на прв поглед.

Филмот прави неколку отстапувања од книгата, раскажан од гледната точка на Хедли и на Оливер, фрлајќи акцент особено на кревката приказна на Оливер. Наместо Оливер да се врати дома на погребот на својот татко, неговиот аџилак го носи на „живиот погреб“ на неговата мајка која умира.

Прекрасната актерка Џамила Џамил во овој филм игра лик наречен Нараторот, која ја игра клучната улога на судбината и неуморно се труди да ги спои овие ликови, повторно и повторно како стјуардеса за време на летот, царински агент, шанкер на свадбената свеченост, случаен минувач итн.

Па драги мои... верувате ли вие во љубов на прв поглед?

Дали лично сте ја почувствувале?

Јас лично не сум доживеала до сега љубов на прв поглед. Сум доживеала нешто налик на љубов, но по долга анализа и рефлектирање со самата себе сфатив дека за жал никогаш не сум ја имала честа истата да ја почувствувам на своја кожа.

Сепак, верувам во поврзаност на прв поглед. Инстантната поврзаност е многу реална работа.

Љубовта ја доживувам како некој вид патување, комплетно соголување, тргање на маските и живеење низ животот со некого на кој можеш да се потпреш. Мислам дека не можете да го добиете сето ова на 'прв поглед'.

И покрај сите продукциски недостатоци, овој филм цели кон делот од човечкиот мозок кој копнее за романса и добра симпатична приказна.

Неколку пати ме расплака, ме израдува и ме разнежни. Ми ја стопли душата и ми побуди некое чудно, но убаво чувство кое не можам да ви го опишам.

За крај, имате топла препорака да го погледнете овој филм доколку сеуште не сте го направиле тоа.